Prezidente Repúblika, Francisco Guterres "Lú-Olo". Imajen Tatoli/Egas Cristovao

DILI, 22 marsu 2022 (TATOLI)-Prezidente Repúblika, Francisco Guterres Lú Olo, preokupa ho taxa partisipasaun, tanba eleitór kuaze rihun 200 mak la tuir eleisaun prezidensiál ne’ebé hala’o iha 19 marsu 2022.

Notísia Relevante: Rezultadu provizóriu eleisaun Prezidensial 2022-2027, Ramos Horta kontinua lidera  

“Taxa partisipasaun ne’e falla hosi CNE no mós Governu halo kuaze eleitór rihun 300 la tuir eleisaun,” Xefe Estadu hateten ba jornalista sira iha Palásiu Prezindensiál Nicolau Lobato, Bairru Pite, tersa ne’e.

Kandidatu Prezidente Repúblika períodu 2022-2027 ho númeru sorteiu neen (6) ne’e, husu ba CNE ho STAE presiza hadi’a iha eleisaun tuir mai.

Lú Olo simu rezultadu eleisaun prezidensiál 2022 ne’ebé lori nia okupa iha númeru daruak ne’ebé Governu liuhosi CNE no STAE realiza hatudu katak kandidatu Prezidente Repúblika ho númeru sorteiu 14, José Ramos Horta, mak sai vensedór ka okupa númeru primeiru.

Maibé, nia dehan, haree ba rezultadu votasaun ne’e posibilidade sei avansa ba segunda volta entaun nia parte preparadu atu kompete ho José Ramos Horta iha biban tuir mai.

“Demokrásia nia lalaok mak hanesan ne’e. Naturalmente agora eleisaun atu hakat ba segunda volta, ita hotu kandidatu mais votadu sei hakat bá, sempre iha garantia atu manán. Rezultadu mak haree no simu konkore tenke aseita manan ka lakon, simu realidade,” nia hateten.

Kandidadu PR mai hosi partidu Fretilin ne’e, daudaun ne’e halo ona negosiasaun polítika ka komunikasaun ho partidu tolu iha Governu hanesan KHUNTO, PLP inklui kandidadu sira seluk atu bele fó apoiu iha segunda volta.

Lú Olo seida’uk fó sai hala’o komunikasaun polítika ne’e iha ona konsensu ka lae, maibé prosesu ida komunika halo aliansa hodi la’o ba oin.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here