Konsilleiru Másimu Partidu Kmanek Habubas Unidade Nasionál Timoroan (KHUNTO), José dos Santos Naimori Bukar, no Prezidente Partidu KHUNTO, Armanda Berta dos Santos, entre Prezidente Rrepúblika Francisco Guterres Lú Olo no Primeiru-Ministru Taur Matan Ruak nia leet. Imajen/Mídia PR.

DILI, 22 marsu 2022 (TATOLI)—Konsilleiru Másimu Partidu Kmanek Habubas Unidade Nasionál Timoroan (KHUNTO), José dos Santos Naimori Bukar, hateten atu apoiu kandidatu Prezidente Repúblika seluk bainhira akontese eleisaun prezidensiál segunda ronda, sei deside hosi órgaun partidu nian.

“Partidu KHUNTO agora sei haree lai oinsá reuniaun entre estrutura hola desizaun klaru liu ita haree ba eleisaun segunda ronda ne’ebé atu mai,” nia hateten ba jornalista sira bainhira partisipa iha serimónia tomada pose ba membru VIII Governu Konstitusionál na’in-haat (4) iha Palásiu Prezidensiál Nicolau Lobato, Bairru Pite, tersa ne’e.

Daudaun ne’e, seidauk tempu atu ko’alia kona-ba kestaun refere maibé iha loron ida ka rua tan órgaun partidu sei diskute kona-ba asuntu ne’e.

Tanba, nia dehan, sei haree vantajen no desvantajen sira iha prosesu polítiku no oinsá agora kontinua asegura nafatin ho di’ak VIII Governu Konstituisionál tanba iha partidu tolu hanesan, PLP, KHUNTO no FRETILIN.

Naimori informa, iha segunda (21/03) horisehik ne’e, Xefe Governu Taur Matan Ruak konsege ba vizita nia tanba nia moras.

“Ida-ne’e ha’u moras mak Xefe Governu ba haree ha’u hanesan nia alin ida,” Konselleiru Partidu KHUNTO ne’e responde ho hamnasa.

Tuir rezultadu apuramentu finál provizóriu hosi STAE hatudu katak kandidatu Prezidente Repúblika José Ramos Horta ho votu 301481 (46,58%), Francisco Guterres Lú Olo ho votu 143408 (22,16%), Armanda Berta dos Santos ho votu 56289 (8,70%), Lere Anan Timur ho votu 48959 (7,57%), Mariano Assanami Sabino Lopes ho votu 47008 (7,26%).

Kandidatu Prezidente Repúblika Anacleto Ferreira hetan votu 13059 (2,02%), Martinho Germano da Silva Gusmão ho votu 8485 (1,31%), Hermes da Rosa Correia Barros ho votu 7958 (1,23%), Maria Helena Lopes de Jesus ‘Milena’ Pires ho votu 5335 (0,82%), Isabel da Costa Ferreira, 4165 (0,64%).

Kandidatu PR Felisberto Araújo Duarte hetan votu 2615 (0,40%), Constâncio Pinto ho votu 2474 (0,38%), Rogéiro Tiago Lobato ho votu 2028 (0,31%), Virgílio da Silva Guterres ho votu 1685 (0,26%), Antero Benedito da Silva ho 1531 (0,24%) no Maria Ângela Freitas da Silva hetan votu 692 (0,11%).

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here