Ministériu Solidariedade Sosiál no Inkluzaun (MSSI) sensibiliza programa "Bolsa da Mae " jerasaun foun ba autoridade lokál sira iha postu administrativu Malina, munisípiu Bobonaro. Imajen Tatoli/Sérgio da Cruz.

BOBONARO, 22 marsu 2022 (TATOLI) – Ministériu Solidariedade Sosiál no Inkuzaun (MSSI) tersa ne’e sensibiliza programa “Bolsa da Mãe” jerasaun foun ba autoridade lokál sira iha postu administrativu Maliana, munisípiu Bobonaro.

Xefe Koperasaun Parseria MSSI, João Maria da Costa Coimbra, esplika atividade ne’e hanesan faze preparasaun ba iha implementasaun Bolsa da Mãe sira antes no programa foun ne’ebé sei implementa.

“Programa ne’e la’ós buat foun ida nia hanesan mós ida uluk ne’e, maibé nia iha diferensa oituan de’it, uluk MSSI mak kaer maibé agora ita serbisu fali ho saúde, entaun ohin ita mai ko’alia ba malu depois fila ba uma, ema husu karik Bolsa da Mãe ba jerasaun foun ne’e mak ida oinsá ne’e, atu ita bele iha bukae atu ba  sira, tanba autoridade lokál sira mak sai ajente ida atu hatutan programa ne’e ba ema hotu,” nia heteten salaun administrasaun Bobonaro.

Diretór Sentru Solidariedade Sosiál Munisípiu Bobonaro, Francisco da Costa Tilman, reforsa atividade sensibilizasaun ne’e bolu líder komunitária sira atu idak-idak bele sai matan, tilun no liman ba programa governu ne’e nune’e inan isin-rua sira hotu bele asesu.

“Ho kriasaun dekretu lei foun ne’e atu fasilita ona jerasaun foun atubele ukun rai ida-ne’e iha futuru, maibé nasaun hakarak haree kedas hahú hosi inan nia kanotak atu nune’e jerasaun ida-ne’e mosu mai hanoin mak atu dezenvolve rai ida-ne’e,” nia katak.

Nune’e Sekretáriu Autoridade Munisípiu Bobonaro, João de Fátima do Carmo, agradese ba Governu tanba hili ona Bobonaro sai hanesan alvu ba programa ne’e, no fiar katak liuhosi implementasaun programa ne’e bele tulnu inan-isin rua ho hadi’ak liutan dezenvolve saúde labarik sira-nia.

Nia husu ba autoridade lokál sira atu serbisu hamutuk ho parte saúde atubele fahe informasaun ba inan-aman tanba programa ne’e mós fó ona korajen ba inan-isin rua sira atu mai partu iha fasilidade saúde sira atubele asesu programa ne’e.

Razaun governu hamosu programa foun ne’e tanba bazea ba dadus estatístika 2015 to’o 2017 indika populasaun Timor-leste iha taxa pobreza no má-nutrisaun aas ho nia indikasaun 42% mak moris iha lina pobreza nia okos, 55% populasaun kiak mak labarik sira no 47% labarik sira ho kondisaun raes badak.

Portantu Bolsa da mae ba jerasaun foun hanesan programa pilotu ida no munisípiu alvu ba faze dahuluk mak hanesan Bobonaro, Ainaro no Rejiaun administrativu Espesial Oe-Cuse Ambeno (RAEOA).

Tanba dadus iha 2020 ne’e mós hatudu katak labarik raes badak sira iha otas fulan (0-59) iha munisípiu Ainaro 60%, Bobonaro 50,3% no RAEOA 57,1%. Nune’e governu establese dekretu lei númeru 22/2021, novembru atu fó subsídiu liuhosi transferénsia establese sistema asisténsia sosiál ba jerasaun foun sira.

Programa ne’e nia valór orsamentu la hanesan ho bolsa da mãe atuál, mak hanesan ba inan isin-rua ho nia valór orsamentu $15 kada fulan to’o nia partu, no bainhira bebé ida moris to’o nia atinje ona tinan tolu, nia hetan $20 kada fulan no inan ne’e la hetan ona maibé bebé ne’e mak hetan no estende to’o tinan neen (6).

Subsídiu ne’e mós fahe ba parte rua mak hanaran, ida subsídiu gravides ba inan isin-rua atubele proteje feto sira durante períodu grávida no subsídiu ba labarik atribui ba labarik ho idade (0-3) kontinua to’o idade tinan neen, atu proteje labarik sira iha tempu dezenvolvimentu infánsia aumenta mós suplementu adisionál ba labarik sira ho moras króniku ka defisiénsia.

Enkuantu Objetivu hosi programa Bolsa da Mae ba jerasaun  foun ne’e mak atu hamenus todan ekonomia ba família sira hodi redús pobreza, hadi’ak saúde nutrisaun, inklui redús raes badak no haburas ekonomia ba hotu-hotu.

Programa ne’e MSSI serbisu hamutuk ho Ministériu Saúde no Governu Australia liuhosi Partnership Development Program (PHD) atu sidadaun hotu-hotu bainhira isin-rua, nia tenke asesu ba fasilidade saúde hodi hetan atendimentu. Bainhira deteta ona katak nia isin-rua, nia sei rejistu tama iha programa bolsa da mãe ba jerasaun foun.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here