Kandidatu Prezidente Repúblika independente ba períodu 2022-2027, Felizberto Araújo Duarte, halo kampaña iha merkadu Gleno, Ermera. Imajen TATOLI/Anito Soares

DILI, 22 marsu 2022 (TATOLI)Kandidatu Prezidente Repúblika (PR) independente ba períodu 2022-2027, ho númeru sorteiu 15, Felizberto Araújo Duarte, seidauk deside apoiu kandidatura ruma iha eleisaun segunda volta.

Bazeia ba atualizasaun apuramentu ikus hosi Sekretariadu Tékniku Administrasaun Estatál (STAE), Felizberto Araújo Duarte, hetan votu 2.615 (0,40%) ne’ebé hanesan pozisaun 11 entre kandidatu 15 seluk.

“Ha’u seidauk deside atu apoiu kandidatu rua ne’e ida, tanba ha’u sei haree lai. Ita lakohi atu ba apoiu fali kandidatura ne’ebé laiha programa maibé trata malu de’it mak barak,” Felizberto hateten ba Agência TATOLI, via telefónika, tersa ne’e.

Notísia relevante: Kandidatu PR Felizberto hakarak Timor-Leste prósperu ho esforsu jerasaun foun

Kandidatu PR, José Ramos Horta ho votu 301.481 (46,58%), enkuantu Kandidatu PR, Francisco Guterres ‘Lú Olo’ ho votu 143.408 (22,16%), ne’ebé posibilidade kandidatura rua kompete iha eleisaun segunda volta.

Tuir kandidatura indepndente ne’e, maski la avansa ba segunda volta, maibé sei ezerse ninia votu konfiansa, tanba ne’e presiza haree didi’ak atu labele deside sala.

“Ha’u lakohi hamosu polémika iha públiku nia le’et, atu naran de’it fó apoiu ba kandidatura ida iha segunda ronda ne’e. Ha’u lakohi halakon konfiansa hosi ha’u-nia apoiante sira, atu loron ikus sira dehan joven ida ne’e konkorre tiha iha Eleisaun Prezidensiál la liu ona, agora mai arbiru de’it lori votu fó tun fó sa’e ba kandidatura sira ne’e. Se lae tinan-lima mai ema bele dehan joven ne’e mós ninia identidade hanesan ho ema sira ne’e, ne’ebé haree no estuda halo didi’ak lai atu ezerse votu ba kandidatu na’in-rua ne’ebé sei konkorre ba segunda ronda ne’e,” nia tenik.

Maski nune’e, Felizberto orgullu nu’udar jerasaun foun ida ne’ebé ho otas kiik liu entre kandidatu seluk, bele kandidata-an ho eleitorál 7.000 bainhira rejistu iha Tribunál Rekursu, hodi kompete iha Eleisaun Prezidensiál 2022.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here