Ekipa CVTL halo fumigasaun hodi prevene surtu dengue iha bairru Becusse Sentrál, kinta (20/01/2022). Imajen Tatoli/Francisco Sony.

DILI, 22 marsu 2022 (TATOLI)—Administradór Cristo Rei, munisípiu Dili, Venancio Tavares, husu Ministériu Saúde (MS) halo sensibilizasaun kona-ba moras dengue ba komunidade, nune’e bele hado’ok an hosi moras dengue.

“Ha’u rekomenda ba Pesoál Saúde sira tenke esplika klaru kona-bá moras dengue ba ita-nia komunidade sira, hanesan susuk ne’e nia moris hanusa no susuk nia atividade la’o iha loron ka kalan, ida-ne’e komunidade sira presiza hatene atu nune’e ita-nia komunidade sira bele komprende hodi koidadu sira-nia oan,” Venancio Tavares, hateten ba Agéncia Tatoli, iha nia knaar-fatin Becora, Díli, tersa ne’e.

Tuir nia, durante ne’e komunidade sira seidauk hatene susuk nia atividade iha loron ka kalan tanba oras ne’ebé susuk halo nia atividade ne’e inan-aman sira la uza moskiteiru ba labarik sira, inklui husik labarik isin molik, entaun hosi ne’e susuk bele tata labarik sira to’o ikus kona moras dengue.

“Tanba ne’e, pesoál saúde sira presiza esplika ba komunidade, liu-liu inan-aman sira atu sira hatene susuk nia atividade la’o sá tempu, nune’e bainhira sira okupadu ho servisu seluk, sira bele kuidadu sira-nia oan hanesan hatoba iha moskiteiru laran no kose mós replenti (ai-moruk susuk) ba labarik sira, atu nune’e bele prevene moras dengue,” nia dehan.

Tanba ne’e, nia husu ba komunidade liu-liu iha postu administrativu Cristo Rei, atu kuidadu labarik sira tanba daudaun ne’e moras dengue sa’e makaas iha Cristo Rei.

“Lema Ministériu Saúde dehan ‘Saúde iha Ita-Nia Liman Rasik’, tanba ne’e ita presiza hamoos ita-nia uma, kuidadu ita-nia oan sira, kuidadu ita-nia ambiente rasik no uma laran tenke moos, nune’e ita bele livre hosi moras dengue no moras ne’e bele redús,” nia dehan.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here