Diretór Jerál STAE, Acilino Manuel Branco. Imajen TATOLI/António ‘Dasiparu’ Gonçalves.

DILI, 21 marsu 2022 (TATOLI)—Sekretariadu Tékniku Administrasaun Eleitorál (STAE) presiza rezultadu evaluasaun hosi observadór sira kona-ba eleisaun prezidensál 2022 ne’ebé realiza iha 19 marsu ne’e.

“Hosi númeru sentru votasaun 1.200 nia prosesu la’o di’ak tebes. Embora ha’u hateten katak iha sentru votasaun ida-rua mak iha fallansu maibé depois eleisaun hotu ita sei haree oinsá atu halo evaluasaun ruma. Ita mós sei hein rezultadu observadór no monitorizadór sira para karik haree took keta kestaun tékniku, entaun ba oin ita sei halo melloramentu no karik liga ho kestaun legál ruma mak parte kompetente sei toma atensaun ba iha situasaun sira balun,” Diretór Jerál STAE, Acilino Manuel Branco,  hateten ba jornalista sira, iha salaun STAE, Dili, segunda ne’e. 

STAE la simu informasaun eskrita maibé STAE mós haree informasaun sira hosi mídia sosiál katak komunidade mós kestiona hela kona-ba sentru votasaun paralelu ne’ebé Governu estabelese iha Dili atu fasilita votante sira.

 “Se aban bainrua karik iha mudansa ba lejislasaun ruma mak dehan katak eleitór vota iha fatin ne’ebé de’it, prontu ha’u hanoin hanesan tékniku mak ita haree oinsá bele halo ajustamentu maibé ajustamentu iha solusaun,” nia dehan.

Eleitór ne’ebé mak rejistu iha sentru votasaun paralelu tolu iha Dili hamutuk 4.032 maibé iha eleisaun ne’ebé realiza iha 19 marsu ne’e, iha eleitór barak mak lakonsege ezerse sira-nia direitu votu iha sentru votasaun paralelu.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here