Ekipa tékniku STAE Baucau transporta urna sensitivu rezultadu apuramentu munisípiu ba CNE nasionál, Segunda (21/03). Imajen TATOLI/Natalino Belo.

BAUCAU, 21 marsu 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau transporta ona urna sensitive eleisaun prezidensiá ba nasionál hafoin finaliza apuramentu nível munisipál.

Diretór STAE Baucau, Lúcio Freitas Salvador, esplika hafoin finaliza apuramentu iha tuku  03:00 dadeersan iha loron segunda ne’e, tanba kondisaun entaun STAE hamutuk ho fiskál kandidatura no observadór sira hamutuk deside transporta urna iha tuku 13:00 ba nasionál.

“Ita agora lori ba nasionál, urna hamutuk haat mak lori ba apuramentu nasionál kompostu hosi votu nulu, reklamadu, akta eletrónika no orijinál hosi sentru votasaun sira,” Diretór STAE Baucau hateten iha Vila Nova, segunda ne’e.

Prosesu transportasaun urna sensitivu ba nasionál akoMpaña hosi funsionáriu STAE Baucau, Komisaun Nasionál Eleisaun (CNE, sigla portugés), fiskál kandidatu sira no hetan seguransa másima hosi membru Polísia Nasionál Timor-Leste (PNTL).

Dadus hosi STAE Baucau hosi tótal akta hamutuk 125 ne’ebé hosi sentru votasaun iha postu Baucau Vila hamutuk 32, Baguia 22, Quelicai 28, Venilale 16, Laga 16 no kiik-liu 11 sentru votasaun.

Rezultadu apuramentu munisípiu Baucau ba eleisaun prezidensiál hatudu katak kandidatu Prezidente Repúblika Francisco Guterres ‘Lú Olo, manán iha munisípiu Baucau ho votu 27.463 (40,15%) hosi totál eleitór na’in-71.137.

Nune’e, apuramentu munisípiu Baucau iha eleisaun prezidensiál hatudu kandidatu Prezidente Repúblika, José Manuel Ramos Horta okupa segundu lugár ho tótal votu hamutuk 15,898 (23,25 %), kandidatu independente Lere Anan Timur hetan votu hamutuk 11,370 (16,62%), tuir kedas kandidata hosi Partidu KHUNTO Armanda Berta dos Santos 5.135 (7,51%).

Enkuantu, kandidatu Partidu Demokrátiku, Mariano Assanami Sabino hetan votu 4.150 (6,07%), Martinho Gusmão 816 (1,19%), Maria Helena Pires hetan votu 759 (1,11%).

Nune’e mós kandidata Isabel Ferreira hetan votu 474 (0,69 %), Hermes  Barros 699 (1,02%), Maria Angela Freitas 48 (0,07%), Rogério Lobato 198 (0,29%), Anacleto Bento Ferreira 366 (0,54%), Antero Bendito da Silva 214 (0,31%), Constâncio Pinto 314 (0,46%), Virgílio Guterres 276 (0,40%) no Felisberto Duarte 213 (0,13%).

Totál eleitór ne’ebé ezerse direitu votu iha eleisaun prezidensiál iha Baucau hamutuk na’in-71.137 ho taxa partisipasaun 74,35% hosi total lista eleitór 96.207, kompostu votu nulu hamutuk 2.035 (2,86), reklamasaun 93 (0,13%), rejeitadu 4 (0,01%), abandonadu 17 (0,02), branku 595 (0,84%) no tótal votu válidu 68.393 (96,14%).

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here