Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 21 marsu 2022 (TATOLI) – Komandante Polísia Nasionál Timor-Leste (PNTL) Munisípiu Bobonaro, Superintendente Antoninho Mauluta, apresia eleitór  sira-nia maturidade durante partisipa iha prosesu eleisaun prezidensiál tinan 2022.

Superintendete ne’e hato’o nia apresiasaun ne’e tanba durante prosesu eleisaun prezidensial la’o to’o faze apuramentu munisípiu Bobonaro la rejista kazu krime ruma iha fatin sentru votasaun 130 no estasaun votu 150 nune’e  situasaun seguransa ein-jerál iha munisípiu ne’e la’o ho ambiente pás no establidade.

“Ami orgullu no fó apresiasaun boot ba ita-nia komunidade tomak nomoos joven nia maturidade, tanba dezde eleisaun la’o to’o ohin loron sempre koopera ho seguransa halo buat hotu-hotu la’o ho di’ak iha ita-nia munisípiu tuir lei ne’ebé mak iha,” nia ko’alia iha Maliana, segunda ne’e.

Komandante ne’e husu ba komunidade sira atu kontinua mantein pás no estabilidade iha munisípiu Bobonaro.

Mauluta hatutan, maske iha eleisaun membru PNTL ne’ebé koloka ba sentru votasaun sira hasoru difikuldade oinoin maibé hanesan liman kroak estadu nafatin prontidaun atu asegura materiál sensitivu no la’ós-sensitivu sira ba to’o sentru apuramentu iha nasionál.

Totál membru efetivu ne’ebé destaka ba sentru votasaun 130 no estasaun votu 150 iha postu administrativu Atabae, Balibo, Cailaco, Maliana, Bobonaro no postu administrativu Lolotoe hamutuk na’in-169.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan