Traballadór sira rekolla lixu iha fatin lixu iha área Comoro, tersa (18/12/2021). Imajen TATOLI/António Daciparu

DILI, 21 marsu 2022 (TATOLI)—Xefe Departamentu Saneamentu Munisípiu Dili, Domingos Soriano, informa iha loron eleisaun (19/03) ne’e pesoál saneamentu sira tenke dezloka ba sira-nia munisipiu orijinál hodi ezerse sira-nia direitu votu iha eleisaun prezidensiál 2022, lixu iha Dili aumenta tanba la rekolla.

Nia informa, iha eleisaun loron 19 marsu ne’e pesoál saneamentu sira labele hala’o servisu hodi rekolla lixu iha kapitál Dili tanba sira tenke fila ba sira-nia hela fatin hodi tuir votasaun no iha loron sesta (18/03) ne’e Governu deside sai hanesan toleránsia de pontu.

“Iha sexta lokraik ita-nia maluk sira ne’ebé raut foer sira ba hotu foho, entaun iha preokupasaun uitoan ko’alia kona-bá lixu. Tanba iha sábadu 19 (marsu), los duni, laiha kompañia mak raut lixu iha kapitál Dili. Maske orientasaun hosi Governu liuhosi Prezidente Autoridade Munisípiu Dili katak sáabadu sira tenke raut, maibé iha ema balun inisiativa atu raut lixu maibé ema laiha no kaereta iha maibe ema atu servisu laiha, Ida-ne’e problema uitoan tanba iha loron sábadu ema hotu-hotu tenke hakmatek hodi ba fó vota,” Domingos Soriano, hateten ba Ajénsia Tatoli iha nia knar fatin, Dili, segunda ne’e.

Tanba ne’e, nia hateten, maske iha loron sábadu no domingu ne’e ekupa sanmeamentu labele foti lixu entaun iha segunda (21/03) ne’e Autoridade Munisípiu Dili (AMD) obriga ekipa saneamentu aru rekolla lixu kada loron tenke kamioneta tolu, nune’e bele redús lixu iha kapitál Dili,

“Daudaun ne’e, ekipa saneamentu munisípiu Dili kontinua rekolla lixu iha tanba lixu bainhira loron ida la foti ne’e sidade laran haree la furak. Agora daudaun sira kontinua servisu, tanba fo’er iha dili laran kuandu ita husik loron ida ita haree la di’ak ona,” Domingos Soriano, hateten ba Ajénsia Tatoli iha nia knaar-fatin, Díli, segunda ne’e.

Nia akresenta, ekipa saneamentu munisípiu dili kontinua servisu hahú horseik kareta la’o movimentu hodi foti fo’er iha sidade laran atu nune’e foer bele redúz.

“Ohin, ha’u monitoriza katak karreta la’o hela, maibé uniku ida iha Delta Satu mak sei nakonu hela. Tanba ne’e, ha’u liga fali ba kompañia atu ba raut lixu tanba sira raut ona maibé raut la hotu, ne’ebé ha’u liga ba sira atu kontinua iha ne’ebá, pelemenus ho loron ohin iha Delta Satu bele halo hotu tiha, tanba iha ne’ebá dalan públiku loos,” nia esplika.

Tanba ne’e, Governu liuhosi Departamentu Saneamentu Munisípiu Dili no kompañia kontinua esforsu aan atu sidade Dili haree mós, maibé depende mós ba komunidade sira atu tau lixu iha fatin ne’ebé Governu prepara, nune’e bainhira ekipa saneamentu tun ba foti foer bele lalais.

“Buat hotu depende ba ita-nia komunidade sira iha konsiénsia atu halibur lixu labele so’e arbiru ne’e di’ak. Maibé iha konsiénsia ida so’e lixu arbiru mak aas liu ne’e, parte Governu no kompañia sira esforsu aan halo nusa mós Díli ne’e sei la moos hosi fo’er. Tanba ne’e, ami husu komunidade sira aruma fo’er atu ami ba foti,” nia dehan.

Xefe Departamentu Saneamentu Munisípiu Dili ne’e apela ba komunidade tomak ne’ebé hela iha Dili laran atu tau lixu iha fatin ne’ebé Governu prepara ona, tanba fo’er sira-ne’ebé so’e arbiru ne’e hatudu katak ambiente ba sidade ne’e ladún di’ak.

“Tanba, tuir ami-nia observasaun durante ne’e Governu esforsu aan tau fatin lixu iha fatin hot-hotu, maibé ita-nia komunidade sira ba so’e lixu la so’e ba fatin ne’ebé Governu prepara. Tanba ne’e, bainhira so’e lixu arbiru iha tempu udan hetan inundasaun ita povu rasik mak sei terus no sai vítima ba ida-ne’e,” nia afirma.

Entretantu, kompania ne’ebé dadaun foti lixu iha sidade Dili hamutuk lima (5) maka kompañia  GSA, Nelces, Felipra, Jacrilo no Labilay.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here