DILI, 21 marsu 2022 (TATOLI)-Eleisaun Prezidensiál períodu 2022-2027 ne’ebé akontese sábadu, (19/3/2022) liubá hetan partisipasaun másima hosi votante sira ne’ebé ho kartaun eleitorál iha munisípiu Dili.
Sekretariadu Tékniku Administrasaun Eleitorál (STAE), antes ne’e rejista ona eleitór hamutuk 194.700, nune’e eleitór 148.881 kompostu hosi mane 73.455 no feto 75.426 mak ezerse direitu iha eventu demokrátiku iha sábadu (19/3/2022). Signifika, 22 pursentu mak la partisipa eleisaun prezidensiál.
Tuir rezultadu provizóriu, apuramentu hosi STAE husi munisípiu Dili hatudu kandidatu José Ramos Horta ho númeru sorteiu hetan votu 81.012.
Francisco Guterres Lú Olo ho votu 27.632, Tito da Costa Cristovão ho votu 12.013, Mariano Assanami Sabino Lopes ho votu 8.284, Armanda Berta dos Santos ho votu 8.011.
Tuir kedas, Maria Helena Lopes de Jesus Pires ho votu 2.584, kandidatu Anacleto Bento Perreira ho votu 1.209, Hermes da Rossa Correia Barros ho votu 1.941, Isabel da Costa Ferreira ho votu 1.057, Martinho Germano da Silva Gusmão, votu 996, Virgilio da Silva Guterres Lamukan, votu 336, Antero Bendito da Silva ho votu 309, Felisberto Araújo Duarte, votu 384.
Kandidatu Constancio da Conceição Pinto ho votu 310, Rogeiro Tiago de Fátima Lobato ho votu 222, Maria Angela Freitas da Silva, votu 91.
Klasifikasaun votu tuir dadus ne’ebé STAE relata iha votu validu 98,33% ho eleitór 146.39, votu branku 0.36% ho eleitór 359, votu nulu 1.27% ho eleitór 1.887,votu reklamadu 0.03% ho eleitór 44, votu rezeitadu lima, votu abandonadu 0.01% ho eleitór 15.
Dau-daun ne’e prosesu apuramentu ba rezultadu votasaun eleisaun prezidensiál 2022 kontinua fali ba iha Komisaun Nasionál ba Eleisaun (CNE, sigla portugés) husi munisípiu 12 inklui RAEOA.
Jornalista : Felicidade Ximenes
Editora : Rita Almeida
