Apuramentu ne’ebé la’o munisípiu Baucau finaliza ona iha loron segunda, 21 marsu, tuku 03:00 madrugada. Imajen Tatoli/Natalino Belo.

BAUCAU, 21 marsu 2022 (TATOLI) –  Rezultadu apuramentu munisípiu Baucau ba eleisaun prezidensiál hatudu katak kandidatu Prezidente Repúblika Francisco Guterres ‘Lú Olo, manán iha munisípiu Baucau ho votu 27.463 (40,15%) hosi totál eleitór na’in-71.137.

Sekretariadu Tékniku Administrasaun Eleitorál (STAE) munisípiu hala’o apuramentu iha loron sábadu, 19 marsu, tuku 20:00 kalan no finaliaza iha loron segunda, 21 marsu, tuku 03:00 madrugada ne’ebé hetan partisipasaun másima hosi fiskál no observadór sira.

“Durante loron-ida, kalan-rua ita halo apuramentu, fiskál sira ativu tebes fó hanoin ba malu oinsá lori prosesu ho rezultadu ne’ebé di’ak,” Diretór STAE Baucau, Lúcio Freitas Salvador hateten iha salaun apuramentu Vila Nova, segunda ne’e.

Dadus hosi STAE Baucau hosi tótal akta hamutuk 125 ne’ebé hosi sentru votasaun iha postu Baucau Vila hamutuk 32, Baguia 22, Quelicai 28, Venilale 16, Laga 16 no kiik-liu 11 sentru votasaun.

Nune’e, apuramentu munisípiu Baucau iha eleisaun prezidensiál hatudu kandidatu Prezidente Repúblika, José Manuel Ramos Horta okupa segundu lugár ho tótal votu hamutuk 15,898 (23,25 %), kandidatu independente Lere Anan Timur hetan votu hamutuk 11,370 (16,62%), tuir kedas kandidata hosi Partidu KHUNTO Armanda Berta dos Santos 5.135 (7,51%).

Enkuantu, kandidatu Partidu Demokrátiku, Mariano Assanami Sabino hetan votu 4.150 (6,07%), Martinho Gusmão 816 (1,19%), Maria Helena Pires hetan votu 759 (1,11%).

Nune’e mós kandidata Isabel Ferreira hetan votu 474 (0,69 %), Hermes  Barros 699 (1,02%), Maria Angela Freitas 48 (0,07%), Rogério Lobato 198 (0,29%), Anacleto Bento Ferreira 366 (0,54%), Antero Bendito da Silva 214 (0,31%), Constâncio Pinto 314 (0,46%), Virgílio Guterres 276 (0,40%) no Felisberto Duarte 213 (0,13%).

Totál eleitór ne’ebé ezerse direitu votu iha eleisaun prezidensiál iha Baucau hamutuk na’in-71.137 ho taxa partisipasaun 74,35% hosi total lista eleitór 96.207, kompostu votu nulu hamutuk 2.035 (2,86), reklamasaun 93 (0,13%), rejeitadu 4 (0,01%), abandonadu 17 (0,02), branku 595 (0,84%) no tótal votu válidu 68.393 (96,14%).

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here