Mate-isin Dominica da Silva ne’ebé tara-aan iha suku Lour, munisípiu Bobonaro. Imajen espesiál

BOBONARO, 21 marsu 2022 (TATOLI) – Komandante Polísia Nasionál Timor-leste (PNTL) Munisípiu Bobonaro, superintendente Antoninho Mauluta, fó-sai katak kazu feto ida tara-an iha aldeia Tazgolu, suku Lour, postu administrativu Bobonaro, munisípiu Bobonaro, família deside taka oan prosesu investigasaun.

Kazu ne’e akontese iha domingu, maizumenus tuku 18:00 lokraik, matebian Dominica da Silva idade 22 deside hakotu nia vida liuhosi dalan tara-an  iha ai-hún ida besik uma-kotuk hafoin ne’e matebian nia alin rasik mak hetan bainhira atu ba hari’is iha bee matan.

“Hafoin akontesimentu ita hetan kedas kontaktu no ita orienta kedas polísia investigasaun ba junta kedas ho eskuadra Bobonaro ba kedas iha fatin, depois família, líder komunitária no lia-na’in sira deside katak lakohi lori prosesu ba oin, ami hakarak tanba ida-ne’e la’ós ema seluk mak halo nia mate maibe nia rasik mak hakarak mate,” nia ko’alia iha Maliana, segunda ne’e.

Komandu PNTL Munisípiu Bobonaro liuhosi parte investigasaun tenta halo identifikasaun ba kazu ne’e hodi hatene loloos motivu akontesimentu, maibé família foti desizaun lakohi loke prosesu, nune’e PNTL mós respeita desizaun família  hodi kore tali iha matebian nia kakorok no entrega ba família atu halo prosesu funerál tuir lisan Bunak nian.

“Ami hetan evidénsia iha ninia isin mak telefone ida nia sikat iha hirus-matan no tau handset metan ida iha ninia tilun hela, maibé númeru telefone ne’ebé nia konkatu, ita la konsege hetan tanba família deside lakohi loke prosesu, ikus mai ita entrga ba família kedas,” nia haktuir.

Komandante ne’e hatutan, matebian foin remata ninia estudu nível sekundáriu iha 2021 iha munisípiu Covalima. Molok tara-aan, Dominica da Silva ezerse ona direitu votu ba kandidatu Prezidente Repúblika iha sentru votasaun suku Lour.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here