Kampus IOB, Fomentu, Dili. Imajen/IOB

DILI, 21 marsu 2022 (TATOLI)–Reitór Institutu of Bussiness (IOB), Pedro Ximenes, relata katak estudante hamutuk na’in-20 hosi Fundasaun Falur Rate Laek (FFRL) daudaun ne’e integra ona iha IOB atu hetan edukasaun formál no hasa’e koñesimentu iha área siénsia.

“Estudante hosi fundasaun ne’ebé kontinua estudu iha IOB tanba kooperasaun entre parte rua ne’ebé selebra iha tinan-rua liu ba kotuk, ho intensaun atu prepara sira ba futuru nasaun,” Reitór informa ba Agência TATOLI, iha kampus sentrál Fomentu, segunda ne’e.

Notísia relevante: IOB prepara bolsa estudu 15 ba ADTL iha tinan oin

Estudante hirak ne’e agora enkaixa hotu iha fakuldade tolu iha IOB hanesan ekonomia no jestaun, informasaun komunikasaun teknolojia no otelaria turizmu.

Aleinde ne’e, instituisaun ensinu superiór ne’e halo mós kooperasaun ho fundasaun seluk hanesan DEJUKDIL no maluk ho defisiénsia sira, ne’ebé kooperasaun hirak ne’e tama iha kategoria rejime espesiál.

Iha biban hanesan, Fundadór FFRL no atuál Xefe Estadu Major FALINTIL-Forsa Defeza Timor-Leste (F-FDTL), Tenente Jenerál Falur Rate Laek, hateten, kooperasaun ne’e atu fó oportunidade ba joven sira ne’ebé halibur iha fundasaun atu hetan edukasaun formál iha universidade no iha tempu hanensan ajuda forma karater ema ida ba futuru.

Fundadór FFLR konsidera, ohin loron kompetisaun iha nível akadémiku maka’as tebes, tanba ne’e atu sai estudante ne’ebé iha kualidade, tenke prepara-an didi’ak atu nune’e bainhira termina estudu iha instituisaun ka akadémiku ida, diploma ne’ebé hetan bele útil.

“Ita halo komparasaun, kada tinan instituisaun sira sempre gradua estudante sira, ezemplu iha IOB finalista 5.000, Universidade da Paz (UNPAZ) iha 10.000, aumenta tan estudante hosi universidade seluk, oinsá imi atu kompete iha merkadu traballu, bainhira laiha abilidade no kapasidade, imi-nia diploma sira sei la vale,” nia fó hanoin ba estudante IOB.

Tanba ne’e, ba kestaun edukasaun, Falur hakarak atu jerasaun foun sira bele prepara-an ho di’ak hodi hasoru futuru.

“Tanba ne’e hosi fundasaun fó oportunidade ba joven feto no mane sira atu bele apreende hodi hetan koñesimentu di’ak molok hakat ba edukasaun formál,” nia tenik.

Iha biban ne’e, IOB hahú ona abertura tinan akadémiku foun 2022 ba estudante hamutuk na’in-820, kompostu hosi Maliana na’in-135 no IOB Dili na’in-685, hosi fakuldade tolu hanesan ekonomia jestaun, informasaun komunikasaun teknolojia no otelaria turizmu.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here