iklan

NASIONÁL, ELEISAUN, ERMERA, HEADLINE

Horta manan maioria iha Ermera ho totál votu 37.600

Horta manan maioria iha Ermera ho totál votu 37.600

Kandidatu Prezidente Repúblika períodu 2022-2027 ho númeru sorteiu 14, José Ramos Horta. Imajen Tatoli/Francisco Sony

ERMERA, 20 marsu 2022 (TATOLI) – Rezultadu apuramentu Eleisaun Prezidensiál Périodu 2022-2027 iha munisípiu Ermera hatudu katak kandidatu Prezidente Repúblika José Ramos Horta manan maioria ho votu hamutuk 37.600 ka (59.39 %).

Hafoin Premiadu Nobel da Paz okupa fatin dahuluk, kandidatu prezidente Francisco Guterres ‘Lú Olo’ okupa fatin daruak ho totál votu hamutuk 9.572 ka (15.12 %), tuir kedas ho kandidata Armanda Berta dos Santos sai nu’udar terseiru lugar ho votu hamutuk 4.750 ka (7.50%), no kandidatu Mariano Assanami Sabino Lopes hetan votu hamutuk 3.935 ka (6.22%) hodi okupa fatin da-ha’at.

Enkuantu, kandidatu Anacleto Bento Ferreira hetan mós votu signifikativu iha munisípiu Ermera ho totál votu 3.170 ka (5.01%), no kandidatu Tito da Costa Cristovão ‘Lere Anan Timur’ hetan votu 1.091 ka (1.72%).

Entertantu, votu husi kandidatu sira seluk iha munisipiu Ermera la to’o rihun ida, hanesan, Martinho Germano da Silva Gusmão hetan votu 863 ka (1.36%), Hermes da Rosa Correia Barros hetan votu 570 ka (0.90%), Felizberto Araújo Duarte hetan votu 372 ka (0.59%), Costancio da Conceição Pinto ‘Terus’ hetan votu 306 ka (0.48%), Rogério Tiago de Fátima Lobato hetan votu 287 ka (0.45%), Isabel da Costa Ferreira hetan votu 243 ka (0.38%), Maria Helena Lopes de Jesus Pires hetan votu 173 ka (0.27%), Virgilio da Silva Guterres ‘Lamukan’ hetan votu 146 ka (0.23%), Antero Benedito da Silva hetan votu 140 ka (0.22%) no Maria Angela Freitas da Silva hetan votu 88 ka (0.14%).

Rezultadu provizóriu eleisaun prezidensiál iha munisípiu Ermera anunsia hafoin apuramentu termina iha tuku 9.20 kalan.

Prosesu apuramentu tomak asisti direta husi fiskais kada kandidatu 16, CNE munisipiu Ermera, brigadista STAE, observadór Uniaun Europeia na’in rua, no hetan apoiu seguransa másimu husi Polisia Nasionál Timor-Leste (PNTL).

Tuir dadus STAE, eleitór iha munisípiu Ermera hamutuk 82.714, kompostu husi mane hamutuk 42.621 no feto na’in 40.093.

Husi totál eleitor hirak ne’e, STAE rejista totál votante hamutuk 65.153 ka (79.09%) mak partisipa iha eleisaun prezidensiál 2022-2027.

Husi votante sira ne’e, STAE rejista votu nulu hamutuk 1.386 ka (2.13%), votu branku hamutuk 398 ka (0.61%), votu reklamadu hamutuk 53 ka (0.08%), votu rezeitadu ualu ka (0.01%) no votu validu hamutuk 63.306 ka (97.17%).

Rezultadu apuramentu eleisaun prezidensiál munisípiu Ermera sei aprezenta ba STAE nasionál iha loron segunda (21/03), parte dadeer.

Rezultadu provizóriu apuramentu finál eleisaun prezidensiál periodu 2022-2027 munisípiu Ermera:
1. Isabel da Costa Ferreira 243 (0.38%)
2. Hermes da Rosa Correia Barros 570 (0.90%)
3. Maria Angela Freitas da Silva 88 (0.14%)
4. Rogério Tiago de Fátima Lobato 287 (0.45%)
5. Anacleto Bento Ferreira 3.170 (5.01%)
6. Francisco Guterres ‘Lú Olo’ 9.572 (15.12%)
7. Maria Helena Lopes de Jesus Pires 173 (0.27%)
8. Tito da Costa Cristovão ‘Lere Anan Timur’ 1.091 (1.72%)
9. Armanda Berta dos Santos 4.750 (7.50%)
10. Antero Benedito da Silva 140 (0.22%)
11. Costancio da Conceição Pinto ‘Terus’ 306 (0.48%)
12. Virgilio da Silva Guterres ‘Lamukan’ 146 (0.23%)
13. Martinho Germano da Silva Gusmão 863 (1.36%)
14. José Ramos Horta 37.600 (59.39%)
15. Felizberto Araújo Duarte 372 (0.59%)
16. Mariano Assanami Sabino Lopes 3.935 (6.22%)

Iha munisípiu Ermera, totál sentru votasaun 115, no totál estasaun hamutuk 135.

Jornalista: Filomeno Martins
Editór: Rafy Belo

iklan
iklan

Leave a Reply

iklan
error: Content is protected !!