Komunidade forma hamrik iha lina laran hodi hein atu ba vota, iha sentru votasaun Eskola No 5 Comoro, sabadu (19/03). Imajen Tatoli/Francisco Sony.

AILEU, 21 marsu 2022 (TATOLI)—Diretóra Sekretariadu Tékniku Administrasaun Eleitoral (STAE) Munisípiu Aileu, Romana de Jesus Alves informa, eleitór hamutuk 4.916 iha Aileu la tuir votasaun iha Eleisaun Prezidensial període 2022-2027 ne’e.

“Husi total eleitóres ne’ebe mak la tuir vota hamutuk 4.916 husi total eleitór 33.524. No eleitór ne’ebé mak tuir votasaun 28.608 (85,34%),” hateten Diretóra STAE, Romana de Jesus ba jornalista iha nia kna’ar fatin, Aileu.

Notisia relevante : Ramos Horta manán iha Munisípiu Aileu ho votu 16.431, Lú Olo segundu lugar

Tuir Romana, antes ne’e STAE, halo ona sosializasaun, iha sentru votasaun, ho objektivu atu eduka eleitóres sira vota ho lo’os no justu iha kada postu administrativu Aileu.

“Sosializasaun ne’ebé hala’o iha Postu Administrativu to’o ba iha Laulara, Lekidoe,  Remexio no Aileu nian. Ami pasa ona informasaun ba sira, maibe wainhra sira la tuir vota ne’e konsiensia ema ida-idak nian,” nia dehan.

Alende ne’e Administradór Munisípiu Aileu, Abel da Conceção hateten katak husi eleitór  ne’ebé la partisipa ba votasaun oituan liu duke hirak ne’ebé partisipa ho total 85,34%. Ne’e hatudu rezultadu diak.

“Fila-fali ba ita nia sidadaun ninian konsiensia. Sira sente katak elisaun ne’e importante ka lae, hanesan nasaun ida Demokratiku ita tenki ezerse ita nia direitu hodi hili ita nian Prezidente Repúblika tuir Konstitusaun RDTL,” dehan Administrador Munisípiu ne’e.

Nia hatutan tan katak, esforsu hotu hala’o husi   STAE no autoridade relevante. Maibé,  atu partisipa iha votasaun fila fali ba ida-idak nia konsiensia.

Sekretariadu Tékniku Administrasaun Eleitorál (STAE) rejista total 852.500 eleitór  iha territóriu nasionál  no diaspora 7.113.

Total 852.500 eleitór  iha territóriu nasionál  ne’e mak husi munisípiu Dili iha eleitór 190.710,  Aileu (33.603), Ainaro (45.833),  Baucau (96.207), Bobonaro (70.283), Covalima (47.807),  Ermera (82.714), Lautém  (48.012), Liquiça (50.987), Manatuto (35.603), Manufahi (40.825), Viqueque  (58.421) no RAEOA iha eleitór 51,495.

Eleitór  iha  territóriu diaspora ho total 7.113 mak husi  Australia ho total eleitór  1.487, Koreia do Sul  (1.277), Englaterra (2.229), Irlandia do Norte (1.264) no 856 eleitór rejista iha Portugal.

Jornalista : Mirandolina Barros Soares

Editorá      : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here