Eleitór sira hosi suku Usitasa'e, Sub-rejiaun Oésilo, ezerse diretu vota iha sentru votasaun Pune. Imajen Tatoli/Abílio Elo Nini.

OÉ-CUSSE, 21 marsu 2022 (TATOLI) – Eleitór hamutuk na’in-12.582 hosi Rejiaun Administrativa Espesiál Oé-Cusse Ambeno (RAEOA), la konsege ezersie diretu votu iha 19 marsu eleisaun prezidensiál períodu 2022-2027.

“Eleitór 12.582 mak la konsege ezerse sira-nia diretu votu, sira-ne’ebé mai partisipa hamutuk 38.067, tanba antes ne’e STAE rejista eleitór hotu-hotu iha Oé-Cusse atu partisipa iha eleisaun prezidensiál períodu 2022-2027 hamutuk 50.649, maibé ikus mai númeru la partsipa sa’e maka’as,” Diretora STAA Oé-Cusse, Luiza da Costa, ba Agência Tatoli iha Palaban, Oé-Cusse, segunda ne’e.

Diretora STAE RAEOA, Luiza da Costa. Imajen Tatoli/Abílio Elo Nini.

Nia informa, partsipasaun iha períodu ne’e menus, kompara ho períodu antes ne’e iha maibé númeru ladún boot, ida-ne’e faz parte ba eleitór sira-nia konsiénsia, maibé nu’udar sidadaun Timorense iha obrigasaun atu kumpri devér hanesan Timor-oan, tanba antes ne’e STAE ho CNE esforsu durante fulan lima, tún ba baze halo edukasaun votante no edukasaun sívíka, maibé rezultadu barak mak laiha konsiénsia atu ba vota.

“Ami sensibiliza iha aldeia tama suku sira hotu, hanesan iha sub-rejiaun Oésilo, Pássabe, Nítibe, Pante Makasar, inklui mós halo sensibilizasaun iha eskola sekundáriu sira, maibé ne’e fila-fali ba idak-idak nia konsiénsia,” nia katak.

Tuir kontajen hosi ofisiál Sekretariadu Tékniku Administrasaun Eleitorál (STAE), iha RAEOA hahú halo apuramentu iha domingu 20 marsu ne’e, rejista votu abandonadu (1) votu nulu 438 (1,15%), branku 133 (0,35%), reklamadu 31 (0,08%) no rejeitadu (1), nune’e totál votu válidu 37.463 (98,41%).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here