Kandidatu Prezidente Repúblika períodu 2022-2027 ho númeru sorteiu 14, José Ramos Horta, hamutuk ho ekipa realiza konferénsia imprensa iha sede nasionál Hudi Laran, domingu (20/03). Imajen Tatoli/Francisco Sony

DILI, 20 marsu 2022 (TATOLI)-Kandidatu Prezidente Repúblika períodu 2022-2027 ho númeru sorteiu 14, José Ramos Horta, hato’o ninia agradesementu ba povu ne’ebé fó ona konfiansa iha eleisaun ne’ebé  hala’o horisehik, sábadu (19/3).

Kandidatu Prezidente Repúblika períodu 2022-2027 ho númeru sorteiu 14, José Ramos Horta. Imajen Tatoli/Francisco Sony

“Agradese ba hotu-hotu ne’ebé ho matenek apoia ona ha’u, obviamente Maun Boot Xanana Gusmão ho nia partidu CNRT, movimentu no organizasaun oi-oin, ha’u hakruk ba sira-nia konfiansa ne’ebé fó mai-ha’u no sai todan liután”, Ramos Horta hato’o liuhosi konferénsia imprensa ne’ebé hala’o iha sede nasionál kandidatu-nian Hudi Laran, domingu, (20/3).

Nia dehan fiar án manán ona iha primeira volta. “Ha’u sente pozitivu tebes ho númeru ne’ebé sa’e barak iha kuaze munisípiu hotu-hotu ba ha’u-nia kandidatura no aritmétika imposivel la liu kedas iha primera volta”, tenik nia.

Horta mós agradese ba povu no joven sira-nian komportamentu iha prosesu eleisaun ne’ebé la’o di’ak tebtebes. “Militante sira hatudu komportamentu 100% la’o di’ak no laiha violasaun lei no provokasaun ruma ne’ebé sira halo”, katak.

Nia mos agradese ba servisu jornalista nasionál no internasionál hosi plataforma oi-oin ne’ebé presta ona sira-nian profisionalizmu iha prosesu demokrátiku.

Eis Prezidente Repúblika ne’e agradese ba orgaun eleitorál sira, parte seguransa no mós observadór nasionál, internasionál hosi Uniaun Eropea no CPLP.

“Ha’u agradese ba membru PNTL no F-FDTL ne’ebé hala’o ona servisu di’ak teb-tebes no ha’u orgullu ba sira nia servisu, ha’u elojia ba STAE; liu-liu diretór nasionál no tékniku sira inklui CNE ne’ebé jeralmente hatudu servisu di’ak”.

Portavós kandidatura, Tomás do Rosário Cabral, mós hato’o ninia agradesimentu ba fiskál kuaze 6500, organizasaun movimentu partidu ho estrutura partidu hosi aldeia, suku, postu, munisípiu no sekretariadu sira ne’ebé estabelese iha munisípiu ho forma polítika hosi movimentu sira, maske hasoru difikuldade oioin.

“Ba fiskais no estrutura tomak, movimentu no partidu sira ne’ebé maka apoia ona kandidatura José Ramos Horta, ami hato’o obrigadu tanba kontribuisaun sira, ita-nia kandidatura bele hetan rezultadu lidera provizoriamente”, Cabral katak.

Eis Vise Ministru Estatal ne’e agradese mós lider komunitáriu sira iha Timor laran tomak, tanba akompaña ona transportasaun urna sira to’o iha sentru votasaun. “Agradese ba kolaborasaun Timor-oan iha rai-liur, tanba sira nafatin fó apoiu para halo eleisaun, no hatudu ita nia kandidatu hetan rezultadu ne’ebé di’ak”.

Notísia relevante: Horta otimista alkansa vitória iha eleisaun prezidensiál

Jornalista       : Francisco Sony

Editora           : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here