ERMERA, 19 marsu 2022 (TATOLI) – Rezultadu apuramentu eleisaun prezidensiál iha Suku Ponilala hatudu katak, kandidatu Prezidenti José Ramos Horta manan maioria ho votu 1.000, no Francisco Guterres ‘Lú Olo’ okupa segundu lugar ho totál votu 646.

Enkuantu, kandidata Armanda Berta dos Santos okupa terseiru lugar ho totál votu 352.

Entretantu kandidatu sira seluk nia votu menus husi atus ida, hanesan kandidatu Mariano Assanami Sabino Lopes hetan votu 78, Tito da Costa Cristovão hetan votu 37, Martinho Gusmão hetan votu 26, Anacleto Bento Fereirra hetan votu 14, Felisberto Araújo Duarte hetan votu 7, Rogerio Tiago Lobato hetan votu 7, Antero Benedito da Silva hetan votu 7, Hermes da Rosa Barros hetan votu 7, Isabel da Costa hetan votu 5, Maria Helena Pires hetan votu 5, Maria Angela Freitas hetan votu 5, Costancio da Conceição Pinto hetan votu 4, no Virgilio da Silva Guterres hetan votu 2.

Eleisaun prezidensiál iha suku Ponilala hahú husi tuku 7 dader, no kontajen votu komesa husi tuku 3 loro kraik to tuku 8.30 kalan.

Maske udan bo’ot, komunidade entuziasmu hodi hein to rezultadu kontajen votu ramata.

Tuir lista STAE, husi eleitór 2.849, na’in 2251 mak tuir votasaun, no STAE rejistu totál votu válidu hamutuk 2.223, votu nulu 36, no votu branku hamutuk 13.

Observadór CNE iha suku Ponilala, Gelasio Soares hateten eleisaun prezidensiál iha suku refere la’o ho normál: “Maibé ita iha eleitór na’in rua mak lori kartaun eleitorál fotokopia, entaun STAE la autoriza sira atu vota. Nune’e mós iha eleitór difisiente matan na’in ha’at mak ohin konsege ezerse sira-nia nia direitu hodi vota.”

Bento Salsinha, fiskais husi kandidatu Francisco Guterres ‘Lú Olo’ hateten prosesu eleisaun prezidensiál la’o diak tebes tanba nunka akontese problema ruma.

Iha fatin hanesan, Damião Trindade Salsinha, fiskais husi kandidatu José Ramos Horta haktuir parte hotu simu rezultadu apuramentu eleisaun prezidensiál iha suku Ponilala, no laiha ema ida mak halo reklamasaun.

Alberto Babo nu’udar fiskais husi kandidata Armanda Berta dos Santos dehan, eleisaun prezidensiál períodu 2022-2027 di’ak liu eleisaun iha pasadu tanba populasaun partisipa ho masimu no hakmatek.

Suku Ponilala iha sentru votasaun rua, estasaun votasaun tolu, observadór CNE na’in ha’at, brigadista STAE na’in rua no polling staff hamutuk nain 30. Entre kandidatu 16, kada kandidatu iha ninia fiskais rasik.

Journalista: Filomeno Martins

 Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here