Estalista Rui Carvalho haloot ona iha Semitériu Becusse. Imajen/Isaura Lemos.

DILI, 20 marsu 2022 (TATOLI) – Estilista timoroan, Rui Manuel dos Mártires Carvalho, haloot ona ohin, iha nia fatin maktoban ikus, iha Semitériu Becusse, hafoin misa rekiem iha kapela Nossa Senhora do Rosário, iha Bidau Licedere, Dili.

Vítor Carvalho, maun husi Rui Carvalho, informa katak matebian hakotu iis, horisehik 03h30 iha Hospitál Nasionál Guido Valadares (HNGV) tanba sofre moras komplikadu, liuliu tumor liver.

“Nia moras komplikadu uitoan, sofre tumor liver. Nia tama iha óspitál iha oras balun de’it. Bá iha 21h00 no iis kotu iha 03h30 madrugada”, hateten Vítor Carvalho, iha Bidau Licedere.

Tuir nia, matebian kondisaun tun uitoan ona no ekipamentu médiku la adekuadu hodi atende moras sira. Tanba ne’e, nia deside halo junta médika atu bá Jakarta, maibé presiza tempu ho trata dokumentu. “Aban ka bainrua mak foin atu bá foti vistu, nia hakotu iis antes tiha”, nia konta.

“Ema ne’e iha prínsipiu ida. Nia lakohi halo ema preokupa ba nia. Nia ema ida independente. Matebian ho ami hela iha suku Bemori”, akresenta tan.

Rui Manuel dos Mártires Carvalho, moris iha Dili, iha loron 11 fulan-maiu 1973. Oan husi Mariano dos Mártires Carvalho no Edith Madeira Carvalho. Matebian iha maun alin hamutuk nain-neen.

Falesidu hahú eskola bázika iha SDK Balide, Pré-Sekundária SMP 3 Becora no remata Sekundária iha SMA 1 Becora. Kontinua estudu iha Universidade Udayana Bali, no hasai kursu iha área Akademi Bahasa Asing.

Além de kursu akadémiku, nia mós hasai formasaun iha área bartender iha Melbourne, Austrália, no kursu modeling iha Bandung, Indonézia.

Rui Carvalho sai na’in ba Collection Boutique. Nia mós iha esperiénsia hanesan Prezidente Board Vivos, Sekretáriu Jerál ba HIV/SIDA, Departamentu Handicraf iha Fundasaun Alola, Programa Small Green husi USAID.

Sai mós Prezidente Artezanatu Timor-Leste, Fundadór Sangar Timor-Furak, Prezidente Asosiasaun Designer Timor-Leste, motivadór iha relasaun internasionál hodi promove tais ba mundu.

Nia harii mós grupu Fashion Rui Collection Management hodi halibur no eduka joven sira iha mundu moda, motiva feto rurál kona-ba soru tais, serbisu ba programa rádiu Hirondel  iha RTTL no obra husi Rui Carvalho iha Mundu Moda.

Matebian hahú nia karreira desfile ba moda ka fashion show iha 2002 to’o 2022. Nia mós partisipa fashion show iha Indonézia, Sigapura, Austrália, Itália no Noruega. Sai mós hanesan dezeñadór ba roupa, liuliu roupa kazamentu ne’ebé hetan apresiasaun boot husi kliente sira no Governu.

 Jornalista: Isaura Lemos de Deus

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here