Xefe suku Bene-Ufe, Marcos Meni. Imajen Tatoli/Abílio Elo Nini.

OÉ-CUSSE, 20 marsu 2022 (TATOLI) – Ema deskoñesidu sunu-mutuk uma ida iha aldeia Lamasin, suku Bene-Ufue, sub-rejiaun Nítibe, Rejiaun Administrativa Espesiál O­é-Cusse Ambeno (RAEOA), iha loron sábadu, maizumentus tuku 17:00 lokraik.

Uma-ne’ebe sunu hosi ema deskoñese ne’e konfirmadu xefe aldeia Lamasin, Domingos Seco, nia uma.

Xefe suku Bene-Ufe, Marcos Meni, haktuir, ema deskonsidu mak sunu xefe aldeia nia uma iha loron eleisaun presizidnsiál 19 marsu, sábadu lokraik.

“Ema deskoñsidu mak sunu, iha sábadu, maizumentus tuku 17.00 lokraik, uma mamuk laiha ema ida atu hein uma, tanba xefe aldeia ne’e ba iha sentru votasaun akompaña hela apuramentu iha sentru votasaun Lamasin. Ami hakfodak, loloos uma haat tanba uma duut besik malu, maibé ahi-haan aserta loos xefe aldeia nia uma de’it,” Marcos Meni informa ba Agência Tatoli liuhosi telefónika iha Oé-Cusse, domingu ne’e.

Nia informa, hafoin akontesimentu ne’e, komunidade iha sentru votasaun ne’e mak haree ahi nia suar sa’e maka’as, nune’e nia parte aviza ba komunidade-sira, balu lori bee atu ba rega  maibé la konsege tanba uma duut.

Autoridade komunitária ne’e, informa akontesimentu laiha relasaun ho polítika nian, tanba to’o agora seidauk identifika autór ruma ba insidente ne’e.

“Akontesimentu laiha deskonfia ba ligasaun polítika, tanba ami durante ne’e serbisu ba komunidade hanesan autoridade komunitária iha Bene-Ufe, maibé ami mós hakfodak dezastre akontese fali iha loron eleisaun iha oras apuramentu nian,” nia katak.

Nune’e, ho akontesimentu ne’e, parte autoridade komunitáriu suku Bene-Ufe seiduak relata ba iha Ministériu Solidariedade Sosiál, tanba vítima sira sei identifika hela sasán balun inklui autór sunu uma.

“Ha’u sei informa ba parte sosiál nune’e bele tau atensaun ba vítima sira, no sei hatama pedidiu apoia hosi PNTL atu halo identifikasaun ba autór ne’ebé sunu ona ha’u-nia xefe aldeia nia uma,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here