Ofisiál eleitorál sira organiza eleisaun prezidensiál iha sentru votasaun Masin, suku Costa. Imajen Tatoli/Abílio Elo Nini.

OÉ-CUSSE, 19 marsu 2022 (TATOLI) – Diretora Sekretariadu Téknika Administrasaun Eleitorál (STAE), Luiza da Costa, fó-sai katak prosesu eleisaun ne’ebé la’o iha enclave ne’e la’o ho susesu.

“Ha’u sempre atualiza beibeik informasaun ba brigadista-sira, maibé rezultadu hatudu di’ak, prosesu tomak hahú hosi dadeer to’o loraik ne’e, la’o ho kontroladu,” Luiza da Costa informa ba Agência Tatoli iha Palaban, Oé-Cusse, sábadu ne’e.

Tuir nia, prosesu eleisaun ne’e realiza hahú hosi tuku 7:00 dadersan to’o tuku loraik ne’e sentru votasaun maioria remata iha tuku 12:00 meudia, maibé tuir lei eleitorál to’o tuku tolu kuandu eleitór barak, entaun estende tan, maibé la akontese.

“Entaun ha’u simu informasaun hosi prezidente meza ka brigadista-sira katak kuaze remata ona, entaun ha’u orienta-sira iha tuku 3:00 liu hahú prepara, nune’e tama tuku 4:00 iha hahú halo apuramentu, hafoin transporta halo apuramentu munisipál,” nia katak.

Entretantu, totál eleitór ne’ebé partisipa iha eleisaun prezidensiál 19 marsu 2022, iha RAEOA hamutuk 51.495 komposta hosi mane 26.232, feto 25.263, ho totál sentru votasaun 60 no estasaun votasaun 88, ne’ebé envolve brigadista na’in-60 no ofisiál eleitorál na’in-880.

Diretór CNE RAEOA, Tomás Oqui Meta, hatete, situasaun ein-jerál iha Oé-Cusse la’o di’ak, laiha prolema hosi sentru 60 no estasaun 88 ne’ebé estabelese ona, iha suku 18 hotu-hotu la’o di’ak.

“Ita la simu informasaun ruma kona-ba perturbasaun iha sentru votasaun, ida-ne’e hatudu katak ita-nia eleitór sira kontribui atu fó susesu ba realizasaun eleisaun iha Oé-Cusse,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan