Komunidade suku Bairru Pite ezerse sira-nia direitu votu hodi hili Prezidente Repúblika 2022-2027, sábadu (19 marsu 2022). Imajen Tatoli/Nelson de Sousa.

DILI, 19 marsu 2022 (TATOLI)—Dadeersan nakukun, iha sábadu (19 marsu 2022) iha tuku 05h00 madrugada, povu Timor-Leste tomak halelak-an foti ain la’o hakbesik ba sentru votasaun atu ezerse ninia mehi liuhosi “votu ida” ho “mehi ida” hodi hili “líder ida” ne’ebé sai sira-nia Prezidente Repúblika períodu 2022-2027 ne’ebé bele haodmi povu.

Liuhosi sira-nia “votu ida” ne’ebé sira oferese ne’e, sira hamriik ho “mehi ida” ne’ebé boot no hakarak tebes duni katak Prezidente ne’ebé eleitu iha eleisaun prezidensiál 2022 ne’e, sai tebes duni Prezidente Repúblika ba povu tomak no sai Prezidente Repúblika ne’ebé sei tau povu nia interrese aas liu duke tau grupu ka partidu ida-nia interrese mak aas liu buat hotu.

Xefe Aldeia Transporte Aero de Timor, suku Bairru Pite, postu administrativu Don Aleixo, munisípiu Dili, Junior de Jesus Barros, iha esperansa ba Prezidente Repúblika ba períodu 2022-2027 ne’ebé mak eleitu ne’e sei tau interrese povu nian aas liu buat hotu.

Xefe Aldeia Xefe Aldeia ransporte Aero de Timor Bairru Pite, hosi suku Bairru Pite, postu administrativu Don Aleixo, munisípiu Dili, Junior de Jesus Barros. Imajen Tatoli/Nelson de Sousa.

“Ami-nia esperansa ba kandidatu Prezidente Repúblika ida-ne’ebé manán mak buat hotu tenke tau interese povu nian aas liu interese hotu, hanesan hatuur ona iha lei tuir nia dalan, só ida-ne’e mak ita hakarak,” Xefe Aldeia ne’e hateten ba Agéncia Tatoli hafoin ezerse votu iha sentru votasaun eskola primária iha Bairru Pite, sábadu ne’e.

Ninia “mehi ida” no “votu ida” ne’ebé nia oferese ba ne’e, hanesan oferta ida-ne’ebé bele hamosu figura Prezidente Repúblika ida-ne’ebé nia hakarak mak tenke Prezidente Repúblika ida-ne’ebé hatene hakuak povu hotu hodi laharee ba kór partidu no rasa.

Votante Maria dos Santos hateten, loron ohin importante tebes hodi bele hili Xefe Estadu foun ba períodu tinan lima mai, tanba prosesu demokrasia tuir lei kada tinan lima iha eleisaun prezidensiál, nune’e hanesan sidadaun iha obrigasaun ami mai tuir eleisaun.

“Tan ne’e, hafoin ha’u fó ha’u-nia votu ida ne’e, ha’u iha esperansa ida katak ‘votu ida’ sei halo mudansa no ha’u iha esperansa katak Prezidente Repúblika foun ne’ebé eleitu, atu kumpre de’it knar tuir konstituisaun maibé tenke hatene hakuak no hadomi ninia povu sira,” nia dehan.

Atu hadomi povu no rai doben Timor-Leste, nia husu ba Prezidente eleitu atu oinsá mak koordena ho ezekutivu atu lori dezenvolvimentu nasaun ba oin hodi tau atensaun iha área saúde, edukasaun, bee-moos, eletrisidade, estrada, redús númeru dezempregu iha rai laran.

“Tenke halo diálogu ho lidér hotu-hotu, hodi hamutuk diskute diferensa sira-ne’ebé mosi hodi konsentra de’it ba dezenvolvimentu nasionál, nia dehan.

Jornalista : Nelson de Sousa 

Editór      : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here