Komundade Forma atu ba vota hamrik iha lina laran hodi hein ba vota. Iha sentru votasaun Eskola No 5 Comoro, sabadu (19/03). Imajen Tatoli/Francisco Sony

DILI, 19 marsu 2022 (TATOLI)— Populasaun iha Timor-Leste ho esperansa boot ba Prezidente Repúblika (PR) foun ba períodu 2022-2027 atu koopera ho Governu no Parlamentu Nasionál hodi dezenvolve nasaun atu povu hetan moris di’ak. 

Eleisaun prezidensiál 2022 atu hili kandidatu Prezidente Repúblika períodu 2022-2027 ne’e hahú hala’o sábadu (19/03) ohin.

Notísia relevante: Maske la’o dook, Inan no defisiénsia suku Uato-Haco konsege vota

Votante hosi suku Nunira, postu Adminsitativu Laga, munisípiu Baucau, Carlito de Sousa Gama, hateten, nia parte ezerse ona direitu votu ho esperansa boot Prezidente Repúblika eleitu tenke iha ema ne’ebé maduru no esperénsia boot atu ukun povu ho fuan hodi ukun rai ne’e ho di’ak.

“Ha’u-nia esperansa ba Xefe Estadu ne’ebé atu eleitu tenke maduru iha esperénsia hodi ukun rai ida ne’e ho fuan no respeita konstituisaun atu ukun ho loos no iha neutralidade atu dezenvolve liutan rai ida ne’e ho di’ak,” Votante hosi suku Nunira Laga Carlito de Sausa Gama, hateten ba Agência TATOLI iha estasaun votasaun iha suku Nunira-Baucau, sabádu ne’e.

Iha biban hanesan, votante Adilson João da Costa Pereira mós ho esperansa Xefe Estadu ne’ebé hadomi povu ba nia povu ukun ho lolos hodi serbi nia povu too hetan moris diak.

“Hau-nia esperansa ba xefi estadu atu ukun rai ida ne’e ho resposabiliadde atu nune’e povu bele moris ho diak,” votante Adilson João da Costa Pereira informa.

Mario da Costa Cardoso husi Suku Comoro, Aldeia Moris Foun hafoin ezerse nia direitu hanesan sidadadun TL, husu atu Prezidente ne’ebé eleitu tenke iha kapasidade atu hadi’a nasaun no halo ligasaun ho parte estranjeiru atu halo investimentu iha rai-laran no loke kampu traballu ba ema hotu.

Ema ho defisiente, Agapito Xavier Lemos.imajen/Natalino Costa

Entretantu, Ema ho defisiente, Agapito Xavier Lemos dehan hakarak hili Prezidente ne’ebé bele Tau matan ba ema ho difisiente.

“Ha’u hakarak hili duni ha’u nia Prezidente ida ne’ebé maka tau matan duni ba ami difiisiénsia no kbiit la’ek, nune’e ami bele iha moris di’ak,” Agapito Ximenes espera.

Tuir nian kandidatu Prezidente Repúblika nain-16 iha vizaun ne’ebé di’ak hotu ba povu nia moris. Maibé diferensia iha entendimentu polítika.

“Durante ita nia Prezidente no Governu ha’u bele dehan haree ami difisiensia ladiak liu no la aat liu maibé ha’u bele dehan naton ona”, dehan Nia.

Nune’e, Nia agradese ba pesoál servisu fiskál iha sentru votasaun Eskola Primaria Metiaut, tanba bele atende ho di’ak.

“Ha’u kontente tanba  sira iha ne’e  atende ho di’ak to’o ha’u vota sira ajuda dudu tama ba iha votasaun fatin”, Nia agradese.

Notísia relevante: Don Virgílio husu kandidatu PR na’in-16 tenke simu rezultadu

Jornalista : Felicidade Ximenes/Natalino Costa

Editór         : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here