Votante Domingos Barreto, hosi suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 19 marsu 2022 (TATOLI) – Votante sira hosi munisípiu Bobonaro, espera entre kandidatu na’in-16 ne’ebé ida sei eleitu ba Prezidente Repúblika foun maibé tenke kumpre promesa durante kampaña eleitorál.`

Votante Domingos Barreto, hosi aldeia Loloa, suku Holsa, postu administrativu Maliana, munisípiu Bobonaro, hateten, nu’udar sidadaun ida iha eperansa katak kandidatu Prezidente Repúblika na’in-16 ne’e iha ida tenke sai mahon ba povu tomak ba períodu 2022-2027.

“Ha’u-nia hanoin nu’udar prezidente foun liuhosi eleitór sira-nia votu, entaun nia tenke sai prezidente ba nasaun la’ós ba ema eleitór ida ka rua, ho razaun ida-ne’e nia labele hare de’it mak ninia eleitór, maibé tenke tau intrese komún oinsá atu dezenvolve rai ida-ne’e, tanba nia sei mahon ba povu tomak, importante liu mak kumpre promesa sira iha kampaña,” nia informa ba Agência TATOLI, iha Bobonaro, sábadu ne’e.

Votante hosi aldeia Loloa, suku Holsa, postu administrativu Maliana, munisípiu Bobonaro, Terezinha Machado Fernandez. Imajen Tatoli/Sérgio da Cruz.

Votante Terezinha Machado Fernandes hosi suku Holsa, sente kontente tanba ezerse ona direitu nu’udar sidadaun no sidadaun tenke iha sentidu nasionalismu no patriotismu iha festa demokrasia ne’e.

“Planu no programa prioridade ne’ebé promete iha momentu kampaña eleitorál tenke tau iha prioridade, hodi implementa bainhira eleitu hosi povu hodi asume kargu nu’udar xefe estadu,” votante ne’e tatoli.

“Prezidente foun ne’e tenke hatene hadomi, tane-aas povu hotu nia diretu hanesan, nia mós hanesan aman ba nasaun ida tenke vizita beibeik ninia povu, pelumenus fulan-ida dala-ida, nune’e bele hatene povu sira-nia difikuldade iha baze, hodi fó hanoin ba governu atu tau iha planu prioridade,” nia hateten.

Votante Jacinto Bere-Ati, hosi aldeia Bilicou, suku Holsa, postu administrativu Maliana, munisipiu Bobonaro. Imajen Tatoli/Sérgio da Cruz.

Votante Jacinto Bere-Ati da Costa, manifesta ninia sentimentu orgullu, maske Timor-Leste enfrenta situasaun impase polítiku ne’ebé naruk, maibé eleisaun prezidensiál kontinua realiza nafatin hodi fó oportunidade ba povu tomak atu hili prezidente foun.

“Ha’u-nia esperansa mak sira tenke implementa duni mak promesa eleitorál sira iha kampaña ne’e, tanba povu lakohi fó tiha votu, haluha fali buat-ne’ebé sira promete, depois prezidente tenke tau interese povu tomak nian, labele haree liu mak ninia partidu, tanba nia ba tur iha Palásiu Aitarak laran, la’ós reprezenta ema ida ka rua, maibé ne’e reprezenta povu tomak,” nia katak.

Tuir observasaun Ajénsia Tatoli iha terrenu nota katak, sentru votasaun iha suku Holsa ne’ebé kobre eleitór sira husi aldeia Loloa, Bilicou no aldeia Taz, loke iha tuku 7:00 dadeersan, observa hosi Komisaun Nasionál Eleisaun (CNE sigla portugés) akompana hosi fikál kandidatu na’in-16 nia no hetan seguransa hosi PNTL munisípiu Bobonaro.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here