Primeiru-Ministru, Taur Matan Ruak, hafoin vota iha Eskola EBF Metiaut, sábadu (19/03). Imajen TATOLI/Francisco Sony

DILI, 19 marsu 2022 (TATOLI)–Primeiru-Ministru VIII Governu Konstitusionál (PM), Taur Matan Ruak, prefere Prezidente Repúblika (PR) períodu 2022-2027 ne’ebé bele servisu hamutuk ho entidade hotu, nune’e bele dezenvolve rai ba interese Estadu no povu.

“Prezidente Repúblika ne’ebé povu hili ne’e maka ita hotu sei servisu hamutuk ho nia, hodi tinan-lima oin mai kontinua tau-matan ba ita-nia nasaun,” PM Taur hateten hafoin ezerse votu iha sentru votasaun Eskola Ensinu Báziku Filiál (EBF) Metiaut, sábadu ne’e.

Notísia relevante: Ohin, STAE distribui materiál eleisaun ba sentru votasaun 1.200 iha territóriu nasionál

Biban ne’e, Xefe Governu agradese ba populasaun hotu ne’ebé hatudu ona maturidade hodi kria situasaun hakmatek, liuliu parte seguransa hanesan Polísia Nasionál Timor-Leste (PNTL), ne’ebé tau-matan durante kampaña semana-rua to’o loron votasaun ohin bele la’o di’ak.

“Aproveita oportunidade ne’e, agradese ba populasaun tomak tanba kampaña la’o di’ak loos, agradese mós ba instituisaun sira ne’ebé tau-matan ba seguransa hodi kampaña la’o di’ak,” Taur tenik.

Nune’e, eis Prezidente Repúblika hein katak durante votasaun, situasaun kontinua la’o ho di’ak no enkoraja populasaun sira ne’ebé iha ona direitu votu, hodi aproveita ba sentru votasaun atu hili Prezidente Repúblika foun.

Sentru votasaun ne’ebé estabelese iha territóriu tomak hahú loke simultáneamente iha tuku 07:00 to’o 15:00.

Tuir dadus hosi Sekretariadu Tékniku Administrasaun Eleitorál (STAE), to’o loron 08 novembru 2021 eleitór ne’ebé resensiadu no atualizadu foun no tuan iha baze dadus akumula 855.597, kompostu hosi diáspora 6.538 no rai-laran 849.059.

Iha Eleisaun identifika sentru votasaun hamutuk 1.200 no estasaun votu iha 1.500 iha territóriu tomak.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here