Pasiente COVID-19 na’in-ida ne’ebé baixa iha fatin izolamentu Tasi-Tolu, Dili, lakon nia direitu ba vota. Imajen Tatoli/Nelia Fernandes.

DILI, 19 marsu 2022 (TATOLI)—Médiku Jerál iha fatin Izolamentu COVID-19 Tasi-Tolu, Marcelino Abel Soares, informa pasiente COVID-19 ne’ebé baixa hela iha fatin izolamentu Tasi-Tolu ne’e la konsege ezerze ninia direitu votu iha eleisaun prezidensiál 2022 ne’ebé realiza iha sábadu (19/03) ohin.

“Totál pasiente COVID-19 iha fatin izolamentu Tasi-Tolu daudaun ne’e hamutuk na’in-ida (1) ne’ebé mak ohin la ezerse nia direitu votu iha eleisaun prezidensiál 2022 ne’e,” Marcelino Abel Soares hateten ba Agénsia Tatoli, iha fatin Izolamentu COVID-19 Tasi-Tolu, Díli, sábadu ne’e.

Maske nune’e, Médiku Jerál ne’e la lakon esperansa katak kandidatu Prezidente Repúblika períodu 2022-2027 ne’ebé povu fó fiar eleitu sai Prezidente Repúblika tenke sai Prezidente ba ema hotu.

“Ha’u nu’udar sidadaun ida, ha’u-nia esperansa ba iha Prezidente foun ne’ebé eleitu tuir mai tenke sai Prezidente ba povu tomak, nune’e bele hakuak povu Timor-Leste tomak, liu-liu kria estabilidade, hametin nafatin demokrásia nu’udar Nasaun Demokrátiku ida hadomi nia povu no kria nafatin kondisaun ne’ebé favorável no tau matan ba ami joven sira,” nia hateten.

Hanesan sidadaun hanesan timor-oan ida, nia konsege ezerse ninia direitu votu hodi tuir votasaun iha Manatutu no hafoin ne’e mak nia hala’o fali nia knar hanesan médiku ida fatin izolamentu Tasi-Tolu, Dili.

“Tanbá ne’e, pesoálmente ohin ha’u vota tuir ha’u-nia distritu orijin mak distritu Manatutu,” nia dehan.

Nia sente orgullu tuir eleisaun ne’e tanba Timor-Leste bele selebra fila-fali festa demokrásia ida ne’e, nune’e povu Timor-Leste tomak bele hili fila-fali Prezidente Repúblika foun ida atu servi povu no rai Timor-Leste.

Entretantu, totál médiku ne’ebé servisu iha fatin Izolamentu COVID-19 hamutuk na’in-11 ne’ebé kompostu hosi médiku jerál, enfermeiru no parteira.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here