Xefi Departamentu Planu Rekursu Umanu no Estatístika HoREX Baucau, Sebastião Amaral deskute ho tékniku STAE relasiona ho direitu votu, sábadu (19/03). Imajen TATOLI/Natalino Belo.

BAUCAU, 19 marsu 2022 (TATOLI) – Mosu dezentendimentu entre dirijente Hospital Referál Eduardo Ximenes (HoREX) Baucau ho Sekretariadu Tékniku Administrasaun Eleitorál kona-ba eleitór ba iha sentru votasaun ambulante ligadu ho direitu votu iha eleisaun prezidensiál.

HoReX Baucau submete ona lista internadu ba STAE Baucau iha loron 10 antes eleisaun, kompostu hosi pasiente na’in-240 ne’ebé mai hosi munisípiu Viqueque, Lautém, Manatuto no Baucau inklui profisionál saúde na’in-120 ho tótal eleitór 360.

“Lista família pasiente no pasiente ne’ebé ami haruka ba ne’e atuál sira alta fila ona ba uma, entaun sira-ne’ebé foun labele tuir votasaun, ida-ne’e mak problema ba ami,” Xefe Departamentu Planu Rekursu Umanu no Estatístika HoREX Baucau, Sebastião Amaral hateten iha Vila Nova, sábadu ne’e.

Dirijente ne’e husu STAE atu fó orientasaun klaru nune’e responsável ospitál informa ba pasiente no família pasiente sira kona-ba direitu votu.

Entretantu, tuir dadus pasiente sira-ne’ebé daudaun ne’e halo tratamentu iha HoREX Baucau hamutuk ho família ne’ebé hein hamutuk hotu pruvolta na’in-200 resin mak tenke lakon direitu votus tanba naran laiha lista internadu.

Biban hanesan sidadaun hosi aldeia Asa-Safada’e, suku Loiulo, postu administrativu Uatucarbao, Munisípiu Viqueque, Domingas Xavier Filipe, hateten prezensa iha HoREX durante semana-ida ona tanba hein tanba oan mora nune’e sente trite no lamenta ho desizaun STAE nian tanba konsidera labele diskrimina sidadaun nia direitu.

“Ami hakarak vota, maibé STAE sira mai dehan ami-nia naran laiha, ami sidadaun Timor-oan, loloos vota, hein rejista de’it naran ho numeru eleitorál,” Domingas Filipe akresenta.

STAE deside família pasiente no pasiente foun ne’ebé naran la rejista antes loron 10 eleisaun sei lakon direitu votu tanba bazea ba dekretu governu númeru 10/2022 artigu 1 kona-ba ámbitu aplikasaun katak bainhira lista naran eleitór (internadu) submete ba STAE to’o loron 10 antes eleisaun realiza.

“Sira-nia problema ne’e pasiente sira-ne’ebé alta ona, agora lei la k’oalia kona-ba pasiente sai no tama, maibé prevee de’it internadu, signifika katak eleitór ne’ebé lista iha maibe tratamentu hela mak bele vota, enkuantu sira-ne’ebé naran laiha labele vota,” Diretór STAE, Lúcio Freitas Salvador hateten.

STAE rekoñese parte HoREX submete duni lista internadu, maibé propoin fali votante sira alta ona atu subtitui naran foun maibé lei la autoriza maibé válidu ba votante ne’ebé naran rejista iha lista internadu mak vota.

Maske nune’e, paseinte no família pasiente sira-ne’ebé alta ona bele ba vota iha sentru votasaun ne’ebé eziste iha suku tuir kartaun ekeitorál,  bazeia ba unidade geografikamente resensiamentu eleitorál.

Observasaun Ajénsia Tatoli nota katak, ho dezentendimentu refere, maioria pasiente kestiona no STAE deside profesionál saúde hamutuk na’in-120 mak ezerse direitu votu tuir lista ne’ebé submete antes loron 10.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here