Kandidatu Prezidenti Repúblika númeru sorteiu 13, Martinho Gusmão hatama buletin votu ba urna hafoin vota iha sentru votasaun sentral Bahú, Baucau, sábadu (19/03). Imajen Tatoli /Natalino Belo.

BAUCAU, 19 marsu 2022 (TATOLI) – Kandidatu Pezidente Repúblika, Martinho Gusmão ho númeru sorteiu 13 husu ba kandidatu sira seluk atu hatudu maturidade polítika hodi respeita povu nia desizaun iha loron 19 marsu 2022.

Martinho Gusmão hakoslok no kontente tanba hafoin liutiha tempu adultu bele ezerse fali direitu votasaun iha fatin moris no halimar nian bainhira sei ki’ik.

Kandidatu Prezidenti Repúblika númeru sorteiu 13, Martinho Gusmão hatudu liman tinta hafoin vota iha sentru votasaun sentral Bahú, Baucau, sábadu (19/03). Imajen Tatoli/Natalino Belo.

“Ba ita sira-ne’ebé sai kandidatu, iha momentu ida-ne’e mak hatudu maturidade polítika, respeita povu nia desizaun, konstituisaun hateten soberania ne’e iha povu nia liman no ezerse liuhosi konstitusaun ne’ebé dehan liuhosi eleisaun demokrátika mak ita harii kultura demokrátika,” Martinho Gusmão ko’alia iha Baucau, Vila Antiga, sábadu ne’e.

Kandidatu ho númeru sorteiu 13 sei respeita povu nia desizaun liuhosi eleisaun no kontinua husu ba kandidatura seluk atu respeita, hadomi malu no simu rezultadu eleisaun.

“Povu rasik mak hodi kosar-been, raan mak harii nasaun ida-ne’e, dala-ida tán povu sei halo istória no loron 20 maiu 2022 sei repete,” Martinho argumenta.

Kandidatu Prezidente Repúblika ne’e otimista, maske laiha kritéria klaru kona-ba sondajen tanba la tuir sondajen signifika iha operasaun sistemátika hodi destroi prosesu demokrátika.

Nia afirma, nu’udar líder tenke hatudu prátika kultura demokrátika katak bazea ba povu nia moris nune’e kandidatura hotu ideál maibe depende ba povu mak eskolla, tanba vitória iha povu nia-liman.

“Hau hanoin katak ita ba ronde daruak, iha-ne’ebé mak ita haree oinsá perferénsia povu nian,” Martinho hateten.

Observasaun Ajénsia Tatoli nota katak, kandidatu Prezidente Repúblika númeru sorteiu 13 ne’e to’o iha sentru votasaun sentrál, suku Bahú, tuku 07:45 no direitamente forma iha liña hodi ezerse direitu votu.

Jornalsita    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here