Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 19 marsu 2022 (TATOLI)–Komandante Jerál (Komjer) Polísia Nasionál Timor-Leste (PNTL), Komisáriu Faustino da Costa, observa katak provizóriumente situasaun jerál iha ámbitu Eleisaun Prezidensiál iha territóriu nasionál la’o di’ak.

“Hakarak atu informa katak situasaun jerál iha territóriu la’o di’ak, dalaruma ita akompaña akontese situasaun balun hanesan ohin madrugada, Polísia bá kedas atua, maibé seidauk iha situasaun ida grave tebes,” Komjer PNTL, Faustino da Costa, informa hafoin ezerse votu iha sentru votasaun Eskola Ensinu Báziku Filiál (EBF) Farol, sábadu ne’e.

Notísia relevante: Eleisaun Prezidensiál 2022 hahú ohin

Iha loron 18 marsu lorokraik, PNTL fó seguransa ba materiál eleisaun to’o iha sentru votasaun estabelesidu, ne’ebé buat hotu la’o di’ak, maski iha problema oituan ho eletrisidade no klima.

“Sentru votasaun balun iha Covalima no balun iha área Maliana nian mak udan no mota boot, maibé buat hotu konsege la’o di’ak mak to’o agora realiza ona votasaun,” nia haktuir.

Nune’e, Komjer husu povu hotu ne’ebé partisipa iha Eleisaun Prezidensiál hodi ezerse direitu nu’udar sidadaun ho di’ak hodi hili Prezidente Repúblika foun ba tinan-lima.

“Ne’e hanesan festa demokrasia ne’ebé sé de’it bele hakat ba sentru votasaun, ita hotu tenki hatene katak ita-nia kandidatu na’in-16 deklara ona katak entre sira ne’e, sé de’it mak eleitu nia la’ós Prezidente Repúblika ba organizasaun ida ka partidu ida, maibé ba povu tomak, tanba demokrasia mak hanesan ne’e,” Faustino da Costa tenik.

Nia apela ba membru ne’ebé koloka iha sentru votasaun sira hotu, bainhira akontese buat ruma labele foti desizaun mesak, maibé prosesu hotu tenki tuir lei.

Membru PNTL hamutuk 4.000 mak asegura Eleisaun Prezidensiál 2022, maibé la’ós de’it koloka iha sentru votasaun, iha mós ekipa halo patrullamentu bá-mai, no apoiu unidade destakadu no komandu munisipál.

“Ho apoiu hosi observadór no fiskál sira, fiar katak buat hotu la’o di’ak,” nia garante.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here