BAUCAU, 19 marsu 2022 (TATOLI) – Kandidatu Prezidente Repúblika, José Manuel Ramos Horta manán iha kandidatu Martinho Gusmão nia rai moris fatin iha sentru votasaun sentrál, suku Bahú, postu administrativu Baucau, munisípiu Baucau.
Tanba rezultadu votasaun hatudu Martinho Gusmão hetan votu aprovadu ho tótal votante 14.
Eis padre ne’e hateten, sempre simu rezultadu eleisaun no husu ba kandidatu prezidensiál seluk atu hatudu maturidade polítika bainhira rezultadu eleisaun tanba povu mak deside.
“Vitória iha povu nia liman tanba povu mak deside, la’ós iha hau-nia liman no la’ós hosi kualkér ema ko’alia,” Kandidatu númeru sorteiu 13 hateten iha Bahú, Vila Antiga, sábadu ne’e.
Kandidatu númeru sorteiu 14, José Ramos Horta hetan 406 iha sentru votasaun ne’e, Francisco Guterres ‘Lú Olo’ hetan votu 203, Lere Anan Timur hetan votu 143, Armanda Berta dos Santos hetan votu 65 no Mariano Assanami Sabino hetan votu 27.
Nune’e mós kandidata Isabel Ferreira hetan votu lima, Hermes Barros hetan votu sia, Maria Angela Freitas da Silva hetan votu ida, Rógerio Lobato hetan votu rua, Anacleto Ferreira zero, Maria Helena Pires hitu, Antero da Silva tolu, Constâncio Pinto hetan votu haat, Virgílio Guterres hetan votu rua no Felisberto Duarte hetan votu rua.
Entertantu tótal eleitór iha sentru votasaun refere 917, kompostu hosi votu válidu 897, votu nulu 9, reklamasaun zero, rejeitadu zero, abandonadu zero, branku ualu no kanseladu hamutuk tolu.
Jornalista : Natalino Belo
Editór : Evaristo Soares Martins
