Eleitór sira forma hela atu vota. Imajen Tatoli/ António Dasiparu.

DILI, 19 marsu 2022 (TATOLI) – Prezidente meza husi sentru votasaun paralela (SVP) iha jináziu Dili, Elias de Deus, revela katak votante besik rihun ida husi munisípiu Aileu, Ataúro, Ermera, Liquiçá no Manatuto la ezerse sira-nian direitu votu, tanba naran la sai iha lista eleitór ba eleisaun prezidensiál períodu 2022 -2027.

“Ohin ami-nian ekipa iha filla ne’e halo kontajen iha ema besik rihun ida mak la vota tanba naran laiha lista”, Elias de Deus hateten ba Agência TATOLI, iha jináziu Dili, sábadu ne’e.

Nia afirma problema ne’e akontese tanba eleitór balun la halo rejistu no seluk rejistu, maibé la submete dokumentu ba  Sekretariadu Tékniku Administrasaun Eleitorál (STAE).

Prezidente meza husi sentru votasaun paralela (SVP) iha jináziu Dili, Elias de Deus. Imajen/Afonso do Rosário.

“Razaun haruka sira fila ne’e tanba la rejistu no balu rejistu, maibé dokumentu ne’e la submete mai iha STAE. Alein de ne’e, balun hatene hela la rejista sira-nian naran iha STAE, maibé dehan rejista”, nia esplika.

Responsável SVP ne’e rekoñese eleitór sira ne’ebé rejista, maibé naran la mosu tanba falla iha sistema baze de dadus STAE nian.

Tuir Elias de Deus, problema tékniku ne’e akontese tanba sentru ne’e hanesan projetu pilotu ne’ebé foin mak implementa ba dahuluk iha eleisaun prezidensiál tinan ne’e. Nia garante sei hadi’ak liután iha eleisaun sira tuirmai.

Zulmiro Fernandes, eleitór husi Munisípiu Ermera sente triste labele ezerse nia direitu nu’udar sidadaun, maski halo ona rejistu liuhusi pesoál STAE ne’ebé lori lista bá Fakuldade Agrikultura, Universidade Nasionál Timor Lorosa’e (UNTL).

“Ida ne’e akontese tanba falla koordenasaun. Ami prienxe ona formuláriu no simu ona karta deklarasaun husi STAE, maibé ohin mai to’o iha ne’e, naran laiha”, nia lamenta.

Eleisaun iha sentru votasaun ne’e hetan mós seguransa másima husi Polisía Nasíonal Timor-Leste (PNTL) no akompaña husi pesoál observadór husi Misaun Observasaun Uniaun Europeia, Komisaun Nasionál ba Eleisaun (CNE, sigla portugés), sosiedade sivíl no fiskál sira husi kandidatu prezidensiál.

Totál eleitor sira iha STP ne’e hamutuk 671 mai husi munisípiu lima mak hanesan, Aileu, Ataúro, Ermera, Liquiçá no Manatuto.

Tuir dadus STAE, totál eleitór ne’ebé rejista iha sentru votasaun parela iha kapitál hamutuk 4.032.

Jornalista: Afonso do Rosário

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here