Ilustrasaun ema halo votasaun. Imajen/Espesiál

DILI, 19 marsu 2022 (TATOLI)—Ekipa responsável iha sentru votasaun identifika labarik ida ho idade kiik inisiál GCB iha suku bemori, postu administrativu Na’in-Feto, munisípiu Dili, aprezenta ninia kartaun eleitorál ba ekipa identifikadór eleisaun atu hetan direitu ezerse votu iha Eleisaun Prezidensiál maibé la hetan autorizasaun tanba idade sei kiik.

Sekretária sentru votasaun sede suku Bemori, estasaun votu II, Cristalina de Fátima Lobato da Costa, hateten, hafoin simu rezultadu identikasaun hosi ekipa identifikadór, ekipa halo kedan konfirmasaun ho observadór Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés) inklui fiskál sira hosi partidu kona-ba kestaun ne’e, ne’ebé ikus mai la fó autorizasaun ba GCB tuir votasaun.

Notísia relevante: Suku Bemori prepara sentru votasaun rua ba votante 3.637

“Ita-nia alin mane ne’e moris iha loron 12 juñu 2005, loloos tinan ida-ne’e iha fulan-juñu maka foin kompleta idade 17, maibé nia hetan ona kartaun eleitorál iha tinan kotuk. Ami halo konfirmasaun nune’e ekipa observadór sira hotu la fó autorizasaun nia atu vota,” Sekretária Cristalina hateten ba Agência TATOLI, iha sentru votasaun sede suku Bemori, sábadu ne’e.

Maski nune’e, kazu ne’e rasik la hetan intervensaun direita hosi parte seguransa tanba konsidera kestaun ne’e seidauk hamosu situasaun grave.

Iha biban hanesan, Brigada STAE, Agostinha Jenifer Rangel Laku, haktuir materiál sensitivu no naun sensitivu ne’ebé simu  hetan seguransa másimu hosi Polísia Nasionál Timor-Leste (PNTL), ne’ebé molok atu foti tenke hetan autorizasaun hosi parte seguransa hodi halo distribuisaun.

Buletin votu ne’ebé fahe ba suku Bemori hamutuk 2.349, ne’ebé konfirmadu hosi estasaun votu dahuluk 1.053 no estasaun votu saruak 1.296.

Atividade votasaun iha sentru votasaun iha sede suku Bemori la’o ho hakmatek, ne’ebé eleitór sira antusiazmu fó sira nia votu ba Kandidatu PR preferénsia.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here