Membru UPF prepara hela atu fó seguransa ba eleisaun prezidensiál iha munisípiu Bobonaro. Imajen Tatoli/Sérgio da Cruz.

BOBONARO, 18 marsu 2022 (TATOLI) – Komandu Unidade Patrullamentu Fronteira (UPF), lideradu Superintendente Euclides Bello, apoia membru hamutuk na’in-100 ba komandu munisípiu tolu hodi asegura materiál sensitivu no la’ós-sensitivu iha eleisaun prezidensiál.

“Bazea ba pedidu ne’ebé mak komandante munisípiu Bobonaro, RAEOA no Covalima, ami hasai orden serbisu ba membru kuaze 100 apoia komandu munisípiu tolu ne’e hahú ohin halo kontrolu iha eleisaun to’o remata,” Euclides Belo informa ba Agência TATOLI, iha edifísiu STAE Bobonaro, sesta ne’e.

Membru hirak-ne’ebé kolokada apoia komandu PNTL munisípiu tolu ne’e balun mai hosi Kuartél UPF Nu-badak, postu administrativu Balibo, postu integradu sira no sira-ne’ebé iha kompana munisípiu Bobonaro, Rejiaun Administrativu Espesiál Oe-Cuse Ambeno (RAEOA) no fronteira Covalima.

“Maibé membru sira balun iha postu kontinua asegura seguransa iha liña fronteira, tanba ne’e ita espera ho apoiu membru UPF hirak-ne’e bele ajuda komandu munisípiu sira garante seguransa ba ita-nia eleisaun la’o ho susesu,” nia katak.

Maske membru balun koloka ona ba sentru votasaun  no estasaun votu sira iha munisípiu tolu, maibé UPF kontinua halo seguransa másima iha fronteira.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here