Sekretáriu Estadu Formasaun Profisionál no Empregu, Alarico de Rosário, hato’o lia-menon balun ba família, molok esntrega mate-isin traballadór timor-oan, Armando Abel dos Santos, iha Aeroportu Comoro, sesta (18/03). Imajen/SEFOPE

DILI, 18 marsu 2022 (TATOLI)–Sekretáriu Estadu Formasaun Profisionál no Empregu, Alarico de Rosário, akompaña hosi Diretór Jerál Formasaun Profisionál Empregu Paul Alves, Diretór Nasionál Empregu Exteriór Filomeno Soares, entrega ona mate-isin traballadór timor-oan Armando Abel dos Santos ba família.  

Mate-isin transporta ho aviaun hosi Koreia Súl no to’o iha Aeroportu Internasionál Prezidente Nicolau Lobato, Comoro, iha meiu dia, sesta ne’e.

“Motivu hodi rezulta Armando Abel dos Santos lakon vida, tanba iha loron 02 marsu 2022, sira ba hala’o aktividade peska iha tasi sidade Pohan nian maka ró mout, nune’e traballadór timor-oan ne’e la konsege salva nia vida,” Sekretáriu Estadu Alarico hateten molok entrega mate-isin ba família iha Aeroportu Comoro.

Traballadór timor-oan ne’e serbisu iha Koreia Súl iha área peska, hahú iha loron 22 outobru 2019, iha kompaña Kyungsang Bukdo.

Notísia relevante: Traballadór timor-oan Armando mout iha tasi Koreia Súl hakotu iis

 Governante ne’e dehan, Governu Timor-Leste liuhosi SEFOPE haruka timor-oan sira ba serbisu atu hadi’a ekonomia família no nasaun, maibé la espera situasaun ida-ne’e atu akontese.

Nune’e, membru Governu ne’e reprezenta funsionáriu tomak iha SEFOPE, liliu Diresaun Nasionál Empregu Exteriór, hato’o sentidu kondolénsia profunda ba matebian nia família no enkoraja atu forsa nafatin hodi hasoru situasaun ida-ne’e.

Armando Abel dos Santos, moris iha suku Asalau, postu administrativu Cailaco, munisípiu Bobonaro, iha loron 09 abríl 1985, ne’ebé hanesan oan hosi Marcelo Borges no Marciana dos Santos, no maun-alin hamutuk na’in-lima.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here