Ministru Administrasaun Estatál, Miguel Pereira de Carvalho. Imajen TATOLI/Egas Cristovão

BAUCAU, 18 marsu 2022 (TATOLI) – Ministru Administrasaun Estatál, Miguel Pereira de Carvalho, konsidera buletin ne’ebé hetan estragu durante pakotementu tanba kauza hosi mákina imprime.

Ministru Miguel Pereira de Carvalho, esplika, materiál eleisaun prezidensiál hanesan buletin bainhira to’o iha STAE munisípiu halo pakotementu, tanba ne’e tenke verifika no konfirma númeru seriál.

Tanba ne’e, mosu estragu posivelmete iha kondisaun rua hanesan tinta tanba bainhira imprime balun tinta namkari entaun tenke hasai, kondisaun seluk buletin nakles tanba kauza hosi mákina.

“Informasaun sira iha rede sosiál dehan buletin sira ku’ak ne’e laloos, informasaun ne’e falsu no tenta atu dezakredita prosesu eleisaun ne’ebé hala’o hosi órgaun administrasaun eleitorál sira,”  Ministru Admistrasaun Estatal hateten iha Vila Nova, sesta ne’e.

Governante ne’e fundamenta, kondisaun rua ne’e mak halo buletin votu hetan estragu durante prosesu pakotementu iha STAE munisípiu sira.

“Loos mak iha tinta kona no balun nakles, ida-ne’e hasai tiha rejista iha akta nune’e lori fali ba nasionál, tanba ne’e aktu hotu halo tuir lei no regulamentu,” Miguel akresenta.

Situasaun hanesan, posibilidade sei akontese iha loron votasaun tanba bainhira loke sentru votasaun, birgadista sira sei verifika buletin bainhira indetifika aat hasai no rejista iha akta.

Migeul argumenta, fallansu iha buletin votu la’ós eleisaun tinan ne’e mak foin akontese maibé eleisaun antes ne’e akontese ona ho problema ne’ebé hanesan.

Entretantu, prosesu produsaun buletin votu hala’o hosi imprime nasionál no fó ba Sekretariadu Tekniku Admistrasaun Eleitóral (STAE) nasionál no distribui ba munisípiu iha loron kinta, 13 marsu tuir númeru eleitorál munisípiu idak-idak nian no tuir lei tenke iha aumentu 10% hosi númeru eleitorál.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan