Kandidata Prezidente Repúblika períodu 2022-2007, Maria Helena Lopes de Jesus Pires. Imajen Tatoli/Francisco Sony.

DILI, 18 marsu 2022 (TATOLI)—Kandidatu independente na’in-hitu (7) ne’ebé kandidata an ba Prezidente Repúblika períodu 2022-2027, sesta ne’e, halo protesta ba órgaun eleitorál hanesan CNE no STAE ligadu ho preparasaun ba eleisaun prezidensiál 2022.

Porta voz kandidatu independe sira, Maria Helena Lopes de Jesus Pires, hateten Sekretariadu Tékniku Administrasaun Eleitorál (STAE) la halo atualizasaun ba lista votante sira iha kadernu eleitorál nian iha sentru votasaun paralelu sira-ne’ebé Governu estabelese iha Munisípiu Dili.

Tanba, nia dehan, kandidatu independente sira hetan informasaun katak votante balun buka ba atualiza sira-nia informasaun, maibé ofisiál sira iha STAE haruka fila de’it no bainhira ba fali konfima dehan rejistu taka tiha ona.

“Ida-ne’e falta preparasaun ba Eleisaun Prezidensiál ba eleitór sira no laiha informasaun klaru no asesível ba ema hotu. Iha informasaun katak votante balun liu-liu estudante sira, tanba bainhira ba rejista iha sentru votasaun paralelu nian, ofisiál STAE nian hateten ba sira katak sei halo ko’ak sira-nia kartaun eleitorál. Ho hanoin katak sira-nia kartaun eleitorál ne’e importante, sira la konkorda atu halo ko’ak sira-nia kartaun no nu’udar konsekuensia, sei labele ba vota,” Porta voz Kandidatu PR Independente ne’e hateten ba jornalista sira, iha edifísiu Apheda, Fatuhada, Dili, sesta ne’e.

Preparasaun ne’ebé la natón ne’e sei prejudika votante barak, tanba sira sei labele ezerse sira-nia direitu ba vota. Votante sira-ne’ebé hetan efeitu hosi fallansu ida-ne’e hanesan timor-oan sira-ne’ebé maka foin ba Austrália no sira-ne’ebé ho rezidénsia permanente iha Austrália maibé iha 2017 ba oin sira tuir eleisaun iha Timor-Leste.

Bainhira la atualiza kadernu eleitorál, sira mós labele vota iha Austrália no nune’e mós votante sira iha Reinu Unidu, (Inglaterra, Paizes de Gales, Irlanda do Norte no Eskosta) ne’ebé foin bá ka sira-ne’ebé uluk ona iha ne’ebá maibé la halo resensiamentu iha tinan 2018.

“Ida-ne’e hatudu indikasaun prátika sosa votu, tanba Kandidatu Independente sira hetan informasaun katak iha ema balun ne’ebé reprezenta kandidatu balun la’o iha bairru sira hodi fahe osan ba votante sira, ho kompromisiu atu vota ba kandidatu ne’ebé sira reprezenta,” Porta-voz ne’e haktuir.

Milena Pires hateten, prátika ida-ne’e sei indevidamente influénsia votante sira-nia eskolla, no halo ema tauk atu hili tuir sira-nia hanoin rasik.

Bazela ba informasaun sira-ne’e Kandidatu independente sira husu ba STAE atu hala’o loloos ninia knaar iha parte prosesu eleitorál ne’e, nune’e mós
Komisaun Nasionál Eleisaun (CNE-sigla portugés) atu hala’o ninia knaar supervizaun loloos no ho firmeza no imparsialidade.

Husu mós ba kandidatu sira hotu, atu garante prasesu eleitorál ida-ne’ebé respeita sidadaun hotu-hotu nia direitu no Kandidatu Independente ida-idak nia apoiante sira, atu mantein espíritu Demokrátiku no tolerante hodi la monu ba provokasaun no prátika sira-ne’ebé kontra prátika demokrásia nian.

“Kandidatu Independente sira kompromete atu kaer metin nafatin Paktu Unidade Nasionál ne’ebé sira asina hamutuk iha 28 fevereiru 2022 liubá,” nia dehan.

Kandidatu Independente sira hanesan Kandidata PR ho númeru sorteiu ida (1) Isabel da Costa Ferreira, kandidata ho númeru sorteiu tolu (3) Maria Ângela Freitas, kandidatu hjo númeru sorteiu haat (4) Rogério Lobato, kandidata ho númeru sorteiu hitu (7) Maria Helena Lopes de Jesus Pires, kandidatu ndependente ho númeru sorteiu 11 Constâncio Pinto, kandidatu Independente ho númeru sorteiu 12 Virgílio da Silva Guterres no kandidati independente ho númeru sorteiu 10 Antero Benedito

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here