iklan

BOBONARO, ELEISAUN, HEADLINE, MUNISÍPIU, POLÍTIKA

CNE husu PNTL atua indivíduu ne’ebé tenta influénsia eleitór

CNE husu PNTL atua indivíduu ne’ebé tenta influénsia eleitór

Vise-Prezidente CNE, Domingos Barreto. Imajen Tatoli/Sérgio da Cruz.

BOBONARO, 18 marsu 2022 (TATOLI) – Vise-Prezidente Komisaun Nasionál Eleisaun (CNE sigla portugés), Domingos Barreto, husu ba membru Polísia Nasionál Timor-leste atu atua indivíduu ne’ebé tenta influénsia eleitór sira vota latuir konsiénsia.

“Ha’u husu ba membru PNTL tomak atu atua iha situasaun sira-ne’e, karik mosu, imi-nia distánsia ha’u hatene metro 20 hosi sentru votasaun, maibé tenke tau matan hodi haree. Sé mak perturba eleisaun no sé mak atu influensia eleitór vota latuir ninia konsiensia, favor boot ida atua kedas tamba ne’e krime,” nia ko’alia iha Maliana, sesta ne’e.

Nia mós husu ba ekipa brigada sira  bainhira iha prosesu kontajen votu la’o, iha indivíduu ka funsionáriu públiku ne’ebe tenta atu influénsia ekipa sira iha terrenu informa kedas ba superior CNE no STAE no komandante PNTL.

“Ha’u kolia hanesan ne’e tanba iha tinan uluk 2018 iha akontesimentu boot ida iha suku Opa, ita- nia alin balun tenke transporta nia hodi ba to’o Dili atu responsabiliza tanba sentru votasaun nia konta aumenta númeru nia hanoin katak la deskobre, maibé to’o ikus deskobre,” nia akresenta.

Nune’e Vise-Prezidente CNE ne’e hanoin katak, di’akliu lalika koko atu halimar iha loron eleisaun tanba sempre deskobre.

 “Sé ema ruma mak influénsia imi karik, di’akliu lalika halo tuir, hanesan ema Bobonaro-oan, hau hakarak eleisaun ida-ne’e labele iha fraude ruma, ” nia fo hanoin.

Nia apela ba fiskál partidu polítiku no reprezentante kandidatu sira-nian, ne’ebe observa prosesu eleisaun iha sentru votasaun, atu haree mós servisu ne’ebe mak ekipa CNE ho STAE halo nune’e garante duni neutralidade no imparsiál.

Komandante PNTL Munisípiu Bobonaro, Superintendente Antoninho Mauluta, hateten membru PNTL prontu fó seguransa ba eleisaun to’o faze apuramentu nível munisipál mak foin retira.

“Komandu iha ekipa movel BOP ho COE mantein iha kualkér akontesimentu iha-ne’e, kontaktu mai ita aranka kedas. Kuandu mosu krime ruma iha sentru votasaun prezidente meza tenke husu apoiu lalais hosi PNTL atubele atu kedas hodi mai prosesa nia,” nia afirma.

Membru PNTL Munisípiu Bobonaro ne’ebe kolokada atu asegura materiál sensitivu no la’ós- senstivu hamutuk na’in-169 destaka iha sentru votasaun 130 no estasaun votu 150 iha postu administrativu Atabae, Balibo, Cailaco, Maliana, Bobonaro no Lolotoe.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!