Prezidente Komisaun Nasionál Eleisaun (CNE, sigla portugés), José Agostinho da Costa Belo. Imajen Tatoli/Francisco Sony.

DILI, 18 marsu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, husu ba ekipa susesu no apoiante atu labele halo kampaña iha loron silénsiu.

“Loron horisehik (17/03) no ohin (18/03) loron silénsiu ba ita, nune’e husu ba ekipa no apoiante kandidatu sira hotu-hotu atu hakmatek iha ida-idak nia fatin, labele utiliza tempu ne’e atu halo door-to-door hodi influénsia ema, ne’e kontra regra,” Prezidente CNE hateten ba jornalista sira, iha konferénsia imprensa kona-ba distribuisaun materiál eleisaun nian, iha salaun CNE, Dili, sesta ne’e.

Prezidente CNE ne’e hatutan, karik sei halo kampaña no halo door-to-door mak parte seguransa no CNE hetan mak sei hola medida tanba kontra regra no regulamentu sira no paktu ne’ebé hatuur ona.

“Nune’e ita bele asegura eleisaun prezidensiál ho susesu no di’ak liután,” nia dehan.

Aleinde ne’e, Prezidente CNE hateten, CNE mós simu keisa hamutuk 10 ne’ebé liga ho kampaña eleitorál no keisa 10 ne’e akontese iha Munisípiu Baucau, Viqueque no RAEOA.

Maibé ho kestaun ne’e, tuir nia, CNE servisu hamutuk ho PNTL halo hela investigasaun maibé seidauk hatene kazu ne’e karik krime tau ketak no karik kestaun Administrativa entaun sei prosesu tuir situasaun, nune’e sai hanesan baze ida hodi hadi’a kualidade eleisaun tuir mai.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here