Ministru Obra Públika, Salvador Eugênio Soares dos Reis Pires, selebra kontratu ho Diretora Kompañia OM BROTHER'S Lda, Isabelinha da Silva, iha salaun City 8, kinta (17/03). Imajen TATOLI/Francisco Sony

DILI, 17 marsu 2022 (TATOLI)–Governu liuhosi Ministériu Obra Públika (MOP), kinta ne’e, selebra kontratu ho empreza lokál hamutuk 39 hodi implementa projetu Estrada Rurál ba Dezenvolvimentu (R4D, sigla inglés) pakote 39, ne’ebé sei implementa iha tinan 2022.

Ministru Obra Públika, Salvador Eugênio Soares dos Reis Pires. Imajen TATOLI/Francisco Sony

Ministru Obra Públika, Salvador Eugênio Soares dos Reis Pires, konsidera dezenvolvimentu estrada rurál importante tebes hodi apoia komunidade nia atividade, liuliu asesu ba fasilidade públiku sira.

“Haree ba dadus sensu tinan 2015, kuaze populasaun 70% hela iha área rurál, tanba ne’e dezenvolvimentu estrada rurál importante tebes, se ita haree totál distánsia estrada nasionál, munisipál no rurál, ba estrada rurál kobre distánsia boot liu kompara ho estrada sira seluk,” Ministru Salvador hateten hafoin selebra kontratu ho empreza iha salaun City 8, Manleuana, Has-laran.

Notísia relevante: MOP sei reabilita estrada rurál pakote 13 iha Bobonaro

Projetu reabilitasaun ne’e hala’o iha munisípiu lima hanesan Baucau, Liquiçá, Covalima, Viqueque no Bobonaro, ne’ebé hafoin asina kontratu, empreza sira bele hahú ona mobilizasaun hodi implementa.

Tanba projetu ne’e finansia hosi Fundu Infraestrutura ho alokasaun millaun $15 (depende distánsia), maka ho durasaun multianuál, maibé Governu prefere lais liu tinan-ida.

Ministru Obra Públika, Salvador Eugênio Soares dos Reis Pires, troka nota selebrasaun kontratu ho Diretór Kompañia Hugo Amor, Domingos Gouveia Moniz, iha salaun City 8, kinta (17/03). Imajen TATOLI/Francisco Sony

Governu foin reabilita estrada rurál kilómetru 700, ne’ebé kada tinan halo manutensaun períodika no rutina ba estrada sira ne’ebé iha ona.

“Governu hasoru dezafiu finanseira no rekursu umanu, entaun atu atinje mehi ida-ne’e Governu serbisu ho parseiru dezenvolvimentu sira hodi atinje misaun ida. Iha ne’e Governu Austrália sai parseiru boot tebes ba dezenvolvimentu iha Timor-Leste,” Ministru Salvador akresenta.

Enkuantu, programa R4D hahú iha tinan 2012 to’o agora selebra ona akordu ba dala-tolu, ne’ebé Governu Austrália kontribui ona millaun AU$75, hodi finansia planeamentu, treinamentu no supervizaun ba setór públiku no privadu.

“Hanesan mós resprosidade ba Governu Austrália, ba programa ida-ne’e, Governu Timor-Leste iha tinan 2019 liuhosi Konsellu Ministru aprova ona kompromisu hodi Governu aloka orsamentu millaun $20 iha kada tinan fiskál atu kobre kustu asosiadu ba investimentu ne’e,” Ministru tenik.

Governu Austrália fó apoiu liuhosi asisténsia téknika hosi International Labour Organization (ILO), enkuantu Governu Timor-Leste tau verba iha Orsamentu Jerál Estadu (OJE) hodi finansia reabilitasaun no manutensaun estrada rurál sira.

Durante mandatu VIII Governu, hosi tinan 2019 halo ona reabilitasaun estrada rurál hamutuk kilómetru 55, iha tinan 2020 laiha tanba impase polítika, enkuantu iha tinan 2021 reabilita ona kilómetru 183.

Manutensaun períodika iha tinan 2019 hamutuk kilómetru 239, tinan 2021 kilómetru 565, iha tinan 2019 manutensaun rutina hamutuk kilómetru 207 no tinan 2021 hamutuk kilómetru 294.

Biban ne’e, governante ne’e apela ba empreza manán-na’in sira atu serbisu ho responsabilidade no dedikasaun hodi implementa projetu sira ho kualidade, nune’e Governu ho nia reforsu naton bele haree fali buat seluk kada tinan halo neneik maibé bebeik to’o ramata.

Embaixadór Austrália iha Timor-Leste, Bill Costello. Imajen TATOLI/Francisco Sony

Iha biban hanesan, Embaixadór Austrália iha Timor-Leste, Bill Costello, orgullu tanba bele halo parseria ho Governu Timor-Leste hodi halo reabilitasaun no manutensaun estrada rurál ne’ebé importante tebes ba dezenvolvimentu sosiu ekonómiku ba komunidade, liliu iha área rurál.

“Austrália nia asisténsia téknika liuhosi ILO halo parseria ho ajénsia nasionál hodi serbisu apoia Governu Timor-Leste nia programa Estrada Rurál ba Dezenvolvimentu hahú kedas iha tinan 2012, nune’e programa ne’e bele atinje rezultadu dezenvolvimentu ne’ebé signifikante hanesan reabilita, manutensaun no hadi’a estrada rurál kuaze kilómetru 700 (37%) hosi totál rede estrada rurál iha Timor-Leste,” nia hateten.

Tuir Diplomata ne’e, programa reabilitasaun estada rurál ne’e ho intensaun ida hodi fó asesu ba eskola, fasilidade saúde, no merkadu sira iha área rurál.

Aleinde ne’e, hamutuk ho programa ne’e bele dezenvolve ona planu mestre no estratejia investimentu ba estrada rurál ne’ebé sai hanesan mata-dalan ba Governu nia planeamentu no investimentu iha estrada rurál.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

1 KOMENTÁRIU

Leave a Reply to Quintino Borges Cancel reply

Please enter your comment!
Please enter your name here