DILI, 17 marsu 2022 (TATOLI)— Komandante Jerál PNTL, Komisáriu Faustino da Costa, orienta Unidade Polisia Fronteira (UPF) no Komandante munisípiu Covalima no Bobonaro, atu hametin segguransa iha liña fronteira Terrestre hodi trava movimentasaun no atividade merkadoria ilegál iha ámbitu eleisaun prezidesiál ne’ebé realiza iha 19 marsu ne’e.
“Ha’u husu Komandante no membru sira iha fronteira tenke garante katak asegura seguransa ba órgaun eleitorál no materiál sensitivu sira ne’ebé koloka ba sentru votasaun sira. No mós asegura seguransa iha área fronteira ho seriu, nune’e prevene atividade atus ilísitu sira iha ámbitu eleisaun Prezidensiál,” Komisáriu Faustino da Costa, hateten iha Kuartél Jerál PNTL-Caicoli, kinta ne’e.
Komisáriu Faustino dehan membru PNTL sira mós iha direitu ba vota,maibé tenke hatene prosedimentu liuliu knaar PNTL nian.
“Komandu la bandu no lei mós la bandu membru PNTL sira atu vota, maibé tenke hatene kona- bá prosedimentu sira liuliu ba membru sira ne’ebé mak koloka iha Sentru Votasaun sira hodi kumpre no halo tuir,” nia afirma.
Iha fatin hanesan, Komandante UPF, Superintendente Polisia, Euclides Belo, hateten pronto ezekuta orden no kontinua garante seguransa iha liña fronteira iha ámbitu eleisaun prezidesiál.
“Ami sei garante seguransa iha ámbitu eleisaun prezidensiál iha liña fronteira atu la’o di’ak tanba ami sempre iha koordenasaun di’ak Komandante munisípiu rua iha fronteira,” nia akresenta.
Notísia relevante: PNTL koloka membru 200 reforsa seguransa iha eleisaun prezidensiál
Jornalista: Natalino Costa
Editór : Florencio Miranda Ximenes
