Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins. Imajen Tatoli/Francisco Sony.

DILI, 17 marsu 2022 (TATOLI)— Diretór Ezekutivu Servisu Autónomu Medikamentu no Ekipamantu Saúde (SAMES), Santana Martins, hateten estoke nasionál aimoruk vitál no ensensiál hahú menus, maibé daudaun hahú loke konkursu públiku atu kompañia vensedór sira halo akizasaun.

“Estoke aimoruk  enjerál ne’ebé mak daudaun ne’e iha armazein SAMES  menus ona hamutuk 36%, signifika estoke ne’e utrapasa ona ita-nia indikadór sira ne’ebé mak  Governu fó mai ami katak estoke mamuk ne’e labele liu 20%, maibé agora daudaun sa’e to’o 36%,” Diretór Ezekutivu Servisu Autonomu Medikamentus Ekipamantus Saúde (SAMES) Santana Martins informa ohin.

Estoke aimoruk menus atinje ona 36% tanba estoke ne’ebé daudaun laiha mak aimoruk vitál hanesan Acetylsalicylic acid 100mg tabs,Beclometasone Inhalation 50mcg/dose 200 dose inhaler, Benzathine Penicilin  Injection IP 1.2 MU no Ceftriaxone Injetion  Powder Viál/1mg.

Enkuantu, aimoruk esensiál hanesan Chlorpromazine HCL double Scored 100mg tabs no Ciprofloxacin 500mg tabs.

Nune’e, nia dehan, Aprovizionamentu SAMES hahú loke ona konkursu públiku ne’ebé iha ona faze resepsaun dokumentu, maibé konkursu ne’e prioritiza prioridade ba aimoruk vitál tanba item ida laiha bele fó ameasa ba ema nia moris.

“Agora aimoruk esensiál no nesesáriu inklui hemodialisa mak oras ne’e ita publika ona   hodi halo kompetisaun ba kampaña sira, Agora ida ne’ebé mak daudaun ami seidauk simu dokumentu   sira ne’e mak item reajente hosi laboratóriu nasionál,” nia akresenta.

Nia dehan aprovizionamentu SAMES foin lalais mak loke konkursu tanba lista kuantifikasaun hosi Ministériu Saúde submete iha fulan ikus janeiru.

“La’ós SAMES mak deside sosa aimoruk, ho kuantidade hira, maibé SAMES ajusta deit ninia presu ne’e ba iha sistema no kompeténsia atu deside sosa mak Diresaun Nasionál Farmasia Medikamentu hosi Ministériu Saúde,” nia akresenta.

Notísia relevante:  SAMES husu fasilidade saúde-sira hato’o pedidu distribui aimoruk rega susuk

Jornalista : Felicidade Ximenes

Editór         : Florencio Miranda Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here