Vise-Primeiru-Ministru no Ministru ba Planu no Ordenamentu, José Maria dos Reis. Imajen TATOLI/Egas Cristóvão

DILI, 17 marsu 2022 (TATOLI)–Primeiru-Ministru (PM) nu’udar mós Prezidente Komisaun Interministeriál ba reajustamentu Planu Estratéjiku Dezenvolvimentu (PED), Taur Matan Ruak, konvoka reuniaun ho ekipa téknika sira ba progresu reajustamentu Planu Estratéjiku Dezenvolvimentu (PED).

“Ekipa téknika hosi sentru planeamentu integradu iha Ministériu Planu no Ordenamentu nia okos aprezenta kona-ba progresu serbisu ba planu reajustamentu Planu Estratéjiku Dezenvolvimentu 2011-2030. Hafoin reuniaun dahuluk iha loron 12 agustu 2021, hafoin aprova framework ida ne’ebé ekipa téknika aprezenta, atubele guia serbisu reajustamentu ninian,” Vise Primeiru-Ministru no Ministru Planu no Ordenamentu, José Maria dos Reis, hateten, hafoin partisipa reuniaun, iha Palásiu Governu, kinta ne’e.

Notísia relevante: MPO aprezenta estrutura prosesu reajustamentu PED ba Parlamentu Nasionál

Antes ne’e, ekipa ne’e hahú konsultasaun ho entidade barak, hahú hosi igreja katólika, konfesaun relijioza sira, órgaun soberania, akadémiku, sosiedade sivil inklui hamutuk ho diretór sira hosi liña ministériu hotu no ekipa sira halo sondajen ne’ebé mak envolve kuaze ema na’in-15.000 hodi hamutuk entre ekipa téknika ho Ajénsia Nasionál Planeamentu, Monitorizasaun no Avaliasaun (ANAPMA).

Vise PM dehan, ekipa téknika sei halo nafatin konsultasaun ba munisípiu sira hahú iha fulan-abríl.

“Tuir loloos hala’o ona iha fulan-marsu, maibé ho Eleisaun Prezidensiál tenki muda ba fulan-abríl, ne’ebé depende ba eleisaun kuandu avansa ba ronde daruak, entaun difikulta ona ekipa sira-nia servisu,” nia akresenta.

Tuir Ministru, servisu ba reajustamentu PED bazeia ba dokumentu lubuk ida, prinsipalmente bazeia ba PED 2011-2030 no planu VIII Governu, inklui Objetivu Dezenvolvimentu Sustentável (ODS).

“Ami utiliza dokumentu sira ne’e hodi halo revizaun ida atubele halo ajustamentu ba situasaun. Ho sondajen ne’e atu hatene loloos aspirasaun populasaun hateke ba-oin hodi elabora dokumentu. Bainhira atu tama ona iha ninia kontíudu setor no sub setór sira, tenki mai ho aliñamentu pensamentu reál. Konserteza serbisu lubuk ida mak sei hala’o hanesan semináriu nasionál no elaborasaun esbosu preleminár, nune’e to’o fulan-juñu tinan ne’e ami bele hetan ona esbosu preleminár,” nia tenik.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here