Prezidente Komisaun Nasionál Eleisaun (CNE), José Agostinho da Costa Belo. Imajen Tatoli /Egas Cristovão

DILI, 17 marsu 2022 (TATOLI)—Prezidente Komisaun Nasionál Eleisaun (CNE-sigla portgés), José Agostinho da Costa Belo, deside materiál propaganda eleitorál hanesan pamfletu no bandeira ne’ebé taka no harii iha dalan públiku sira, seidauk bele hamoos no sei hasai hafoin eleisaun segunda volta ramata.

“Eleisaun ne’e sei akontese iha 19 marsu no tuir Dekretu Governu númeru 5/2017, loron 27 fevereiru, iha alínea daruak permite ba sira seidauk bele hamoosi tanba eleisaun primeira volta hotu la signifika hotu ona. Karik iha segunda volta entaun ita haree poténsia rua ne’ebé mak avansa entaun hela de’it kandidatu rua mak avansa no kandidatu seluk nian tenke hasai ona no obrigatóriamente,” Prezidente CNE ne’e hateten ba jornalista sira, hafoin partisipa lansamentu Tabulasaun Nasionál iha salaun CNE, Colmera, Dili, kinta ne’e.

Prezidente CNE hateten, agora daudaun sira-nia sasán sei iha hela tanba eleisaun dahuluk mós seidauk hahú no hein bainhira ramata ona mak bele hasai depois fó sai rezultadu tiha mak bele haree hosi ne’e.

Kandidatu hosi partidu CNRT José Manuel Ramos Horta, partidu KHUNTO Armanda Berta dos Santos, partidu FRETILIN Francisco Guterres Lú Olo, hosi PD Mariano ‘Assanami’ Sabino Lopes, Partidu Demokrátiku da Repúblika de Timor (PDRT) Anacleto Bento Ferreira.

Kandidatu independente sira kompostu hosi Felizberto Araújo Duarte, Maria Helena Lopes de Jesus ‘Milena’ Pires, Maria Ángela Freitas da Silva, Isabel da Costa Ferreira, Hermes da Rosa Correia Barros, Tito da Costa Cristovão ‘Lere Anan Timur’, Rogério Tiago de Fátima Lobato  Virgílio da Silva Guterres ‘Lamukan’, Constâncio da Conceição Pinto “Terus”, Antero Benedito da Silva no Martinho Germano da Silva Gusmão.

Regulamentu kampaña no propaganda eleitorál

Bazea ba Dekretu Governu númeru 5/2017, loron 27 fevereiru kona-ba regulamentu kampaña no propaganda eleitorál, artigu 15 alínea dahuluk hateten, kandidatu sira tenke hamoos materiál kampaña propaganda ho prazu semana-ida, hahú loron tuir mai hafoin kampaña eleitorál.

Alínea daruak hosi artigu 15 ne’e mensiona, kandidatu hirak-ne’ebé hakat ba segunda volta sei bele kontinua hala’o nia kampaña propaganda (sei hein rezultadu eleisaun ronde dahuluk).

Alínea datoluk hosi artigu 15 ne’e fundamenta, bainhira materiál sira ladauk limpeza tuir tempu, CNE iha devér hamutuk autoridade seguransa limpeza no dahaat kustu operasaun ba limpeza sei apoia hosi kandidatura sira.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here