Membru Komisaun Jestaun risku dezastre RAEOA hamutuk IOM, identifika suku sai alvu ba projetu bazea ba jéneru iha redusaun risku dezastre. Imajen Tatoli/Abílio Elo Nini.

OÉ-CUSSE, 16 marsu 2022 (TATOLI) – Organizasaun Internasionál ba Migrasaun (IOM, sigla inglés) hamutuk ho Komisaun Jestaun Risku Dezastre iha Rejiaun Administrativa Espesiál Oé-Cusse Ambeno (RAEOA), kuarta ne’e identifika suku lima sai alvu projetu violasaun bazea ba jéneru iha redusaun risku dezastre no levantamentu sentru evakuasaun iha tinan fiskál 2022.

Programa National Officer, ba redusaun risku dezastre no violensia bazea jeneru hosi IOM, Elizabet Araújo, hatete, suku lima ne’ebé sai alvu ba projetu ne’e, iha sub-rejiaun Pante Makasar suku Naimeco no Taiboko. Iha sub-rejiaun Oésilo, suku Bobometo, iha sub-rejiaun Pásabe, suku Malelat no iha sub-rejiaun Nítibe iha suku Bene-Ufe.

“Rezultadu ohin konsulta hamutuk ho Komisaun Jestaun Risku Dezastre Oé-Cusse nian deside ona, suku lima mak sai alvu ba projetu ne’e, ne’ebé IOM sei implemente atividade projetu ne’e hamutuk ho membru jestaun dezastre suku, inklui grupu feto sira-ne’ebé estabelese ona iha suku lima ne’e nia laran,” Elizabet Araújo, informa ba Agência Tatoli iha salaun edukasaun Santa Rosa, Oé-Cusse.

Nia informa, atividade ne’ebé IOM sei hala’o maka sei hala’o uluk formasaun iha kada suku, ho matéria oinsá atu identifika no akumula dadus liuliu komponente bazea jéneru nian, atu responde bazea jéneru iha situasaun emerjénsia bainhira akontese dezastre, ekipa ne’e mak sei fó apoia urjentimente ba vítima sira iha baze.

“Matéria hosi formasaun ne’e sei envolve grupu feto, atu halo desizaun no mapamentu iha suku idak-idak, no halo mós mapamentu ba sentru evakuasaun bainhira akontese dezastre, entaun ekipa iha ona koñesimentu atu atende ho dignu, tán ne’e ita-nia planu sei realiza iha tinan ne’e,” nia katak.

Nia fó-sai katak, Organizasaun Internasionál ba Migrasaun (IOM), durante ne’e implementa ona projetu projetu violasaun bazea ba jéneru iha redusaun risku dezastre no levantamentu sentru evakuasaun, iha munisípiu haat, Dili, Baukau, Covalima no Oé-Cusse.

Ho objetivu atu kontribui hasa’e vizibilidade ba konseitu seguransa no étika ba prevensaun violénsia bazea jéneru, mitigasaun no responde dezastre antes akontese, presiza intervensaun nu’udar rekuperasaun.

Nune’e bele apoia atu hametin reziliénsia kompreensivu hasoru emerjénsia sira-ne’ebé bele mosu, hanesan COVID-19 no siklone tropikál seroja 4 abríl liubá, liuhosi hasa’e feto no labarik feto-nia partisipasaun ba desizaun estrutura redusaun ba risku dezastre nian.

Nune’e mós, liuhosi projetu ne’e bele hakbiit feto no labarik feto-sira, atu identifika jestaun risku sustentável iha komunidade no reziliénsia ba projetu rendimentu moris nian, aliende ne’e harii kapasidade nasionál ba multi-setorál hotu, hodi responde urjente iha mitigasaun violénsia bazea jéneru ho seguru atu fó-sai ba públiku insidente violénsia bazea jéneru.

Objetivu seluk, atu asegura feto nia partisipasaun ativa iha prosesu harii evakuasaun, fornese apoia tékniku no formasaun atu hakbiit kapasidade.

Entretantu, membru hosi Komisaun Jestaun Risku Dezastre iha RAEOA, mak hanesan, Organizasaun Naun Governamentál (ONG) Binibu Faef Nome (BIFANO), Cruz Vermelha Timor-Leste (CVTL), Ministériu Solidariedade Sosiál no Inkluzaun (MSSI), grupu defisiensia, Sekretária Estadu Protesaun Sivíl (SEPS), Sekretaria Rejionál ba Asuntu Agrikultura, ambulánsia, inklui rede referál violénsia bazea ba jéneru.

Projetu ne’ebé IOM ne’e realiza iha munisípiu haat, hetan apoia fundu hosi Korean International Cooperation Agency (KOICA). 

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here