Kandidatu Prezidente Repúblika períodu 2022-2027 ho númeru sorteiu ualu (8), Tito da Costa Cristovão 'Lere Anan Timur'. Imajen Tatoli/Nelson de Sousa.

DILI, 16 marsu 2022 (TATOLI)—Kandidatu Prezidente períodu 2022-2027 ho númeru sorteiu ualu (8), Tito da Costa Cristovão ‘Lere Anan Timur’, kuarta ne’e realiza atividade kampãna ho tipu komisiu ba loron ikus iha kampu Futebol Kampu Baru, Comoro, postu administrativu Don Aleixo, munisípiu Dili.

Lere Anan Timur hateten, bainhira povu fó fiar no eleitu sai Xefe Estadu mak sei ko’alia ho Governu Indonézia liu-liu ho jenerál militár Indonézia sira ne’ebé uluk iha Timor-Leste, oinsá buka tuir saudozu Nicolau Lobato ho sira seluk nia ruin ne’ebé to’o ohin loron seidauk hetan. 

“Bainhira sai Prezidente Repúblika, nia sei ko’alia ho Governu Indonézia atu buka tuir saudozu Nicolau Lobato no eroi seluk nia ruin tanba sira sira mak sai erói hodi fó onra no gloria,” Lere Anan Timur hateten hateten perante ba militante no apoiante rihun ba rihun, iha ninia kampaña dala ikus nian iha Kampu Futebol Kampunh baru, Comoro, Dili.

Nia sei ko’alia mós ho parte Governu buka solusaun hodi halais prosesu verifikasaun dadus veteranu ne’ebé dadaun lao maibé lori tempu naruk ona seida’uk finaliza.

Eis Jenerál Reformadu ne’e promote, bainhira eleitu ba Xefe Estadu mak sei sai guardiaun ba konstituisaun ne’ebé la halis ba grupu no interese pesoál maibé ba de’it interese nasionál.

Kona-ba injustisa sira-ne’ebé durante ne’e kontinua akontese ba povu mak sei ko’alia makaas bainhira ukun na’in sira prátika korrupsaun tenke hatán iha justisa la’ós sees an hosi justisa.

Sai komandante supremu forsa armada mak kontinua prioritiza planu estratéjiku militár ne’ebé iha ona oinsá moderniza instituisaun iha rekursu no ekipamentu sai modernu liután.

Nia sei ko’alia ho ministéiru tutela oinsá mak hadia moris di’ak membru F-FDTL no PNTL no kria bairru ka uma bainhira militár ruma servisu dook hosi sira-nia kaben ka laen, nune’e família bele ba hela besik.

Mezmu la’ós kompeténsia PR nian maibé sei ko’alia ho Governu hodi hadi’a setór importante hanesan saúde, edukasaun no problema báziku populasaun nian hanesan bee mos, estrada, eletrisidade.

Apoiante kandidatu Prezidente Repúblika períodu 2022-2027 ho númeru sorteiu ualu (8), Tito da Costa Cristovão ‘Lere Anan Timur’, partisipa kampaña dala ikus nian iha Kampu Futebol kampu baru, Comoro, Dili. Imajen Tatoli/Nelson de Sousa.

Tanba ne’e, bainhira proposta Orsamentu Jerál Estadu ne’ebé Governu prepara no aprova iha Parlamentu Nasionál hodi haruka ba PR sei estuda fali haree alokasaun ba área hirak ne’e ho pursentu naton atu rezolve situasaun povu mak sei uza kompeténsia promulga.

Parte seluk, nia sei ko’alia hodi reativa atividade arte marsiál tanba to’o agora seidauk iha estatutu arte marsiál oinsá bele hahú atividade hanesan desportu kontribui ba dezenvolvimentu no sei kombate ka halakon movimentu ilegál hosi fronteira terrestre.

Lere promote nia kandidatura sei marka diferensia oinsa mak lori fila-fali estabilidade polítika iha Timor-Leste no sei laiha tan impase polítika oioin mak sei promove diálogu ho lidér hotu no atu bele lori dezenvolvimentu nasaun ba oin.

Ikus liu, nia apela ba juventude sira atu labele kria konflitu oinsá kria pás ho estabilidade no tempu ohin loron presiza fó importánsia ba estudu tanba iha futuru dezenvolve nasaun presiza ema matenek.

Enkuantu, kampaña ne’e kandidatu Lere Anan Timur kumpre kalendáriu kampana eleitorál hosi órgaun eleitorál CNE iha kuarta ne’e (16/03) ne’e hahú iha tuku 14h00 to’o tuku 17h00.

Kampaña ne’e superviziona hosi Komisaun Nasionál Eleisaun (CNE, siglá portugés), observadór internasionál no hetan seguransa másimu hosi Polísia Nasionál Timor-Leste (PNTL).

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here