iklan

NASIONÁL, POLÍTIKA

Prezidente CNE husu deskulpa ba povu Timor-Leste

Prezidente CNE husu deskulpa ba povu Timor-Leste

Prezidente Komisaun Nasionál Eleisaun (CNE, sigla portugés), José Agostinho da Costa Belo. Imajen Tatoli/Francisco Sony

DILI, 16 marsu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, husu deskulpa ba povu Timor-Leste tanba transmisaun direta hosi Televizaun Grupu Nasionál (GMN TV) ba debate públiku entre kandidatu Prezidente Repúblika 2022-2027 hetan fallansu tanba liña internet monu.

Notísia Relevante: Ekipa susesu kandidatu PR lamenta preparasaun CNE ba debate públiku 

“Ho kesatun ne’e ita rasionál no ita simu de’it tanba ami hili ona GMN TV hodi halo transmisaun direta no sosiedade kestiona. Hodi CNE no GMN TV nia naran ami husu deskulpa ba imi hotu tanba ami labele halo hotu. Maibé, labele dehan ema hotu-hotu la asesu informasaun debate ne’e, lae,” José Belo hateten ba Agência TATOLI iha nia knaar fatin Colmera, Dili, kuarta ne’e.

Akontesimentu fallansu tékniku ba transmisaun direta ne’e, nia dehan, la’ós problema boot ida tanba tempu modernu ema barak mak hakarak uza liña internet hodi asesu debate ne’e liuhosi internet entaun rede internete bele todan no monu.

“Transmisaun direta debate públiku ba kandidatu Prezidente Repúblika ne’ebé mak GMN TV realiza ne’e ha’u hanoin di’ak hela no normál tanba buat faillansu tékniku ne’e sempre akontese. Karik televizaun seluk mak halo transmisaun direta mós parese hanesan tanba problema ema hotu-hotu hakarak asesu ba debate liuhosi live streaming entaun konseteza liña internet monu hanesan horikalan ne’e. Maibé ida-ne’e la’ós novidade ida ba ita,” nia dehan.

Maibé, nia dehan, debate públiku ne’e kontinua to’o ramata mezmu falla iha aúdiu mak la moos maibé nia fotografia sai di’ak no moos no mós fó fali tempu ba kandidatu sira hodi resposta ba pergunta sira-ne’ebé CNE prepara.

“Ita iha espetativa boot atu realiza ho di’ak, nune’e komunidade bele asesu no bele satisfas ba informasaun ne’ebé mak ita fó sai, maibé ida-ne’e kondisaun real akontese tanba de’it liña internet monu,” nia hateten.

Husu kona-ba sesaun datoluk ne’ebé lahusu perguntas ho dalen portugés ba kandidatu sira, José Belo hateten, pratikamenta la’ós CNE mak la husu maibé tanba fallansu tékniku no internet ne’ebé la’o hakdasak tebes no tanba kandidatu sira tenke prepara hodi halo kampaña ba loron ikus nian, entaun parte potensiál sira husu hodi taka no termina kedas ho mensajen hosi kandidatu sira.

CNE mak realiza debate públiku entre kandidatu Prezidente repúblika 2022-2027 ne’e, maibé sira mak halo no sira mak debate entaun deside halo tuir de’it sira no taka tanba haree debate ne’e to’o dadeer no fizikamente labele augenta no laiha intensaun ruma.

“Sala ne’e CNE nian maibé atu jere kandidatu Prezidente Repúlika na’in-16 ne’e la’ós fasil ba ita,” nia argumenta.

Ho akontesmentu ne’e, karik iha eleisaun segunda volta mak CNE sei haree lai no ba kestaun ne’e sira-nia parte sei halo evaluasaun no analiza depois mak bele deside fali.

“Agora ita halo lai evaluasaun katak kestaun inkapasidade ka kualidade laiha, ne’e ita lahetene tanba ne’e ita labele julga ema arbiru. Ita la justu ona tanba ne’e presiza halo analiza ba situasaun ne’e,” nia dehan.

Notísia Relevante: Debate para dalan klaran, Prezidente CNE dehan normál

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!