Diretór PDHJ Territoriál Bobonaro, Domingos Pinto Tavares. Imajen Tatoli/Sérgio da Cruz.

BOBONARO, 16 marsu 2022 (TATOLI) – Diretór Provedoria Direitu Humano no Justisa, Delegasaun Territoriál Munisípiu Bobonaro, Domingos Pinto Tavares, fó-sai katak bazea ba atividade monitorizasaun identifika funsionáriu Ministériu Edukasaun, Juventude no Desportu (MEJD) munisípiu Bobonaro na’in-10 partisipa iha kampaña eleitorál.

Funsionariu públiku hirak maioria mane hotu ho inisial AC, CMS, ABJ, JDJ, AS, FDSV, DC, MDN, DNM no DM hosi INFORDEP Maliana, deteta durante períodu kampaña eleitorál. Funsionáriu hirak-ne’e deteta partisipa kampaña kandidatu númeru sorteiu 6, kandidatu 14 no partidu OS Verde de Timor no seluk tán.

“Hahú kampaña hosi kandidatu independente no hosi partidu sira iha loron 02 to’o agora, ami deteta funsionáriu sira-ne’ebé partisipa iha kampaña hamutuk na’in-10. Funsionáriu na’in-10 ne’e hosi servisu edukasaun munisípiu Bobonaro nian hotu,” nia informa ba Tatoli, iha Maliana, kuarta ne’e.

Funsionáriu sira-ne’e deteta liuhosi atividade monitorizasaun iha terrenu bainhira halo koordenasaun ho ekipa supervizaun hosi Komisaun Nasionál Eleisaun (CNE, sigla portugés) munisípiu Bobonaro liuhosi mekanizmu hanesan rekolla funsionáriu sira-nia identidade, hasai fotografia no vídeu.

Diretór ne’e esplika, bazea ba estatuta Komisaun Funsaun Públika (CFP, sigla portugés) bainhira funsionariu públiku sira hakarak hola-parte iha kampaña eleitorál iha oras serbisu tenke hato’o uluk pedidu ba iha CFP no tenke hetan lisensa anuál, lisensa la ho vensimentu no lisensa espesiál hodi hetan autorizasaun.

Nune’e mós foin lalais iha deliberasaun foun estatuta CFP mós fó biban ba funsiánariu públiku partisipa iha kampaña eleitorál maibe iha de’it loron-sábadu no domingu. Enkauntu iha segunda to’o sesta funsionáriu sira tenke ezerse sira-nia funsaun hahú hosi tuku 08.00 to’o tuku 17.30.

“Funsionáriu barak mak hetan ami-nia ekipa la subar tanba dokumentu lisensa anuál kompletu, maibé sira-ne’ebé laiha dokumentu hetan ami-nia ekipa subar. Sira na’in-10 ne’e ita deteta iha hotu dukumentu kompletu, maibé to’o agora ita seidauk hetan prova ruma hosi sira, ” nia akresenta.

Diretór PDHJ Bobonaro ne’e sei konfirma ho superiór husi Servisu Edukasaun Munisípiu Bobonaro atu fó justifikasaun katak funsíonariu hirak-ne’e hetan autorizasaun ka lisensa ruma atu partisipa iha kampana ka lae.

Bainhira laiha lisensa mak sei hato’o relatóriu ba PDHJ nasional atu analiza ho loloos tuir prosedimentu legál, hodi bele enkamiña ba CFP nune’e bele hatún xamada atensaun no fó sansaun disiplinár.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here