Kandidatu Prezidente Repúblika independente ba períodu 2022-2027, ho númeru sorteiu 12, Virgílio da Silva Guterres, hato’o kompromisu ba apoiante sira durante halo kampaña ho tipu diálogu, domingu (13/03) iha aldeia Ilimanu, Manatuto. Imajen TATOLI/Jogerjo Guterres

DILI, 16 marsu 2022 (TATOLI)–Antigu prizioneiru polítiku, Virgílio da Silva Guterres ho naran revolusaun “Lamukan Fera Kakutak” nu’udar kandidatura prezidensiál ba períodu 2022-2027 ho númeru sorteiu 12.

Lamukan nia esperiénsia moruk durante kolonializasaun hosi Indonézia mak lori nia hili lema polítiku prezidensiál kona-ba “Por Um Timor-Leste Mais Fraterno”.

“Ha´u-nia lema dehan ‘Por Um Timor-Leste Mais Faterno’ katak fraternidade nia baze mak komunikasaun no relasaun. Tanba ne’e mak ha´u-nia parte forte atu kandidata-an ba Prezidente Repúblika,” Lamukan hateten ho nia karater hakribit rasismu, divizionizmu no rejionalizmu.

Tuir Lamukan, elementu xave ba atividade hotu-hotu mak durante tinan barak nia laran timor-oan nia komunikasaun polítika ne´ebé falla rezulta Timor-Leste nia dezenvolvimentu ne´ebé ladun la´o no polítiku sira la ko’alia ba malu, tanba ne´e mak motiva nia kandidata-an ba Prezidente Repúblika ba períodu 2022-2027 hodi hadi’a.

Lamukan nu´udar eis-prizioneiru polítiku ida, hafoin restaurasaun independensia, iha 2002, hamutuk ho nia kompatriota eis-prizioneiru sira buka halibur-malu harii organizasaun Associação dos Eis-Prisioneiros Políticos de Timor-Leste (ASSEPPOL) hodi fahe hanoin oinsa atu kontinua kontribui ba prosesu konsolidasaun independensia Timor-Leste nian, liu-liu atu garante sosiedade timorense sai duni “Uma sociedade livre sem prisioneiro político’.

Biografia

Virgílio da Silva Guterres, koñesidu mós ho naran funu “Lamukan Fera Kakutak”, Nia moris iha aldeia Lia-Oli, Suku Baha-Mori, Postu Administrativu Venilale, Munisípiu Baucau. Pertense ba uma-lisan Baha-Wake, oan XI husi maun-alin na’in-11, husi inan-aman Lourenço da Silva Guterres no Ana Maria Lino Ferreira. Aleinde maun-alin biolójiku na’in-10 ne’e, Virgílio Lamukan mós iha maun-alin kultural lubuk ida.

Maun-alin kulturál katak primu/prima no sobriñu sira ne’ebé kulturalmente adopta nu’udar maun ka alin

Virgílio kaben ho Merina Úrsula Xareal, husi uma-lisan Um-Ai-Sur, Pukol, Sorukraik, Ainaro, ho oan na’in tolu (3) mak feto ida, Kayla Maria Ivone Xareal Guterres (9), mane rua, Kailale Norberto Freire Xareal Guterres (11) no Larasesso António Gilmer Xareal Guterres (13).

Virgílio Lamukan hahú nia eskola primária iha tinan 1970 iha Escola do Reino de Venilale. To’o 1974, bainhira konflitu polítika hahú mosu no prosesu aprendizajen regulár (portugés) nian para, Virgílio Lamukan ramata nia 3ª klase.

Durante tinan balun, Virgílio Lamukan ninia estudu interompidu, tanba invazaun militár Indonézia iha 1975. Biar ho otas kiik, Virgílio Lamukan envolve ona iha polítika. Ninia envolvimentu iha polítika hahú kedas iha tinan 1974, hafoin partidu polítiku sira mosu iha Timor-Leste.

Virgílio Lamukan ho nia família iha afiliasaun polítika metin tebes ho FRETILIN. Ho tinan 11 de’it nia hetan ona kartaun Fretilin nu’udar militante.

Ho tinan 11 ne’e no ho nivél edukasaun ne´ebé nia iha (3ª Classe) nia envolve ona iha materializasaun programa polítika FRETILIN nian nu´udar elementu ida husi Brigada Revolusionária ka Brigada Dinamizadora, hodi halo kampaña alfabetizasaun, iha Zona Venilale nian. Iha Brigada Dinamizadora, nia koñesidu ho naran funu Kyu-Kay.

Iha inísiu tinan 1976, wainhira Indonézia kontrola Venilale Vila, Virgilio Lamukan ho nia família evakua ba ai-laran, iha ne´ebé nia ho nia maluk sira kontinua ho atividade politika.

Hamutuk ho nia kamarada na’in-tolu (3), Martinho da Silva no Jacinto da Silva sira halo edukasaun polítika masa bazea ba Manual Polítiku FRETILIN nian ba populasaun Suku Bado-Ho’o nian iha fatin evakuasaun hanesan, Waibobo no Hosobei.

Fila husi ai-laran, Virgílio Lamukan kontinua hikas nia estudu primária iha Eskola Primária Publiku (Sekolah Dasar Negeri) Venilale. Tuir mai, nia kontinua nia kursu pre-sekundáriu iha Colégio Don Bosco Fatumaca.

Iha Fatumaca, aleinde estuda, Virgílio Lamukan mós hala’o knaar nu´udar instrutór (mestre) mekániku ba estudante 2º no 3ºanu Escola Técnica, Departamento Mecánica.

Molok sai instrutór mekániku, iha tihan 1985-1986 nia tuir formasaun téknika nu´udar ‘trainer’ iha Akademi Teknik Mesin Industri (ATMI), Solo, Java Sentral, Indonézia.

Iha 1989, Virgílio Lamukan konklui nia kursu sekundáriu iha Escola Técnica Salesiana Fatumaca no kontinua nia estudu ba Ensinu Superiór iha Indonézia, iha Departamentu Enjineria Mekánika iha Institutu Teknolojia Nasional Malang, Java-Leste.

Lamukan ema ida simples, umilde, brani, matenek, krítiku, determinadu, dedikadu, no responsável. Kualidade hirak ne’e, hamutuk ho nia espiritu nasionalista, patriótika no determinasaun hodi luta ba Timor-Leste nia ukun-rasik-an, bainhira nia ba kontinua nia estudu iha Malang, Virgilio Lamukan deside atu halibur hamutuk ho estudante Timor-oan sira seluk iha RENETIL (Resistência Nacional dos Estudantes de Timor-Leste).

Iha RENETIL maka nia adopta naran revolusionáriu ka naran funu nian “Lamukan Fera Kakutak”

Iha 1990,  hafoin sai militante RENETIL liu-husi juramentu, hamutuk ho nia kompañeiru sira iha sidade Malang, Java Oriental, harii Rejiaun RENETIL nian iha sidade ne´e, ne´ebé sira fo naran Rejiaun LALIKA. Iha tinan 1996, iha prosesu reorganizasaun RENETIL nian, Rejiaun LALIKA nakfilak ba UNER (Unidade Estrategica da Resistência) LALIKA.

Iha Rejiaun LALIKA, Virgílio Lamukan hetan responsabilidade nu’udar Sekretáriu Rejiaun, hodi troka Sekretariu Rejiaun dahuluk, António da Conceição ‘Kalohan Metan’, ne´ebé fila hikas mai Timor-Leste. Hamutuk ho nia kompañeiru luta sira hanesan, António da Conceição ‘Kalohan Metan’, Vicente Pinto ‘Besik-Ona’, Miguel Lobato, Domingos Santos, António Ximenes, Virgílio Lamukan Fátima ‘Kateri’, hamósu grupu diskusaun polítika ho naran MI VIDA.

Grupu MI VIDA sai nu´udar nukleu ida ba estudante nasionalista sira iha Malang hodi komunika-malu, fahe hanoin ba malu no koordena atividade ruma relasiona ho povu maubere nia luta ba ukun-rasik-an.

Aleinde partisipa iha atividade regulár luta nian iha Rejiaun LALIKA, Virgilio Lamukan mós eskolidu atu reprezenta Rejiaun LALIKA atu partisipa iha operasaun AURORA hodi simu delegasaun parlamentu portugés nian, ne´ebé RENETIL prepara kedas iha fulan outubru 1991.

Maibé ho kanselamentu vizita DPP nian, no ho akontesimentu Masakre Santa Cruz, 12 Novembru 1991, Diresaun Sentral RENETIL muda operasaun AURORA ba asaun atu protesta masakre ne’e.

Loron ida hafoin Massakre Santa Cruz, 12 Novembru 1991

Virgílio Lamukan ho nia Compañeiru/a luta lubuk ida hetan orden husi Dirasaun Sentrál RENETIL nian atu hamutuk ho Militante RENETIL sira husi rejiaun sira seluk no estudante nasionalista timor-oan husi sidade seluk iha Indonézia halo “aksi protes” iha Jakarta, kapitál Indonézia nian.

Iha 19 novembru 1991, Lamukan ho nia kompañeiru sira hala´o duni protestu iha Jakarta no polisia Indonézia kaptura sira na’in 70 resin iha Rotunda Hotel Indonézia (Bundaran HI).

Hafoin liuhusi prosesu interrogatóriu durante fulan tolu (3) resin, Virgílio Lamukan hamutuk ho nia kompatriota na’in haat (4) sai arguidu perante tribunál Indonézia nian.

Virgílio Lamukan nia kompatriota na’in haat ne’e mak Fernando de Araújo ‘Lasama’, João Freitas da Câmara, Agapito Cardoso no Domingos Barreto. Ba ninia partisipasaun iha asaun 19 novembru 1991, Virgílio Lamukan hetan pena prizaun tinan rua ho balun (tinan rua fulan nen).

Virgílio Lamukan kumpre sentensa ida ne’e iha fatin detensaun no prizaun sira hanesan POLDA Metrojaya (fulan nen), prizaun Salemba (tinan ida) no prizaun Cipinang (tinan ida).

Iha prizaun Cipinang Virgílio Lamukan hasoru malu tan ho dadur polítiku timor-oan seluk ne´ebé hetan kastigu desde 1980 hanesan Marito Reis no Albino Lourdes. Iha prizaun hanesan mós Virgílio Lamukan hasoru-malu ba dala-uluk ho Presidente Conselho Nacional da Resistência Maubere no Comandante das FALINTIL, Kayrala Xanana Gusmão, ne´ebé kapturadu iha 1992.

Tinan rua ho balun iha prizaun la hamate Virgilio Lamukan nia espiritu luta nian. Hafoin sai husi kadeia, Virgilio Lamukan la fila hikas ba Malang hodi kontinua ninia estudu. Nia simu knar husi Diresaun RENETIL nian atu mantein iha Jakarta hodi kontinua atividade funu nian.

Iha kontestu ida-ne’e, Virgílio Lamukan iha kna’ar xave, hamutuk ho nia Kompañeiru Domingos Sarmento Naga-Soro, iha planeamentu no preparasaun kampu ba implementasaun ‘Operasaun Trepe’ iha 12 novembru 1994, hodi marka komemora aniversáriu III (datolu) Masakre Santa Cruz, iha ne´ebé Asswain Timor-oan nain 29 haksoit tama iha Embaixada Estadus Unidus Amerika iha Jakarta, iha okaziaun Simeira APEC (Asia-Pacific Economic Cooperation), iha Bogor, Indonézia.

Iha manifestasaun ida-ne’e, aleinde estudante na’in-29 ne´ebé konsegue haksoit tama ba Embaixada Estadus Unidus Amérika iha Jakarta, estudante nain 40 resin mós detidu no forsa seguransa Indonézia nian lori hikas ba sidade ne´ebé sira idaidak estuda ba.

Iha tinan 1994 nia klaran, ho estabelesimentu Presidio do Conselho Centra da RENETIL nu´udar estrutura ad hoc ida atu halao funsaun Sekretáriu Jerál nian lorloron, Virgilio Lamukan simu kna’ar nu´udar Responsavel Prinsipal ba Komite Permatente husi Presidiu ne’e.Maske ativu nafatin iha luta, Virgílio Lamukan mós hakarak kontinua nafatin estuda.

Ho tulun husi nia inan-haki’ak Ibu Ade Rostina Sitompul, Virgílio Lamukan kontinua hikas nia estudu iha Departamentu Enjenaria Mekánika iha Institutu Sains dan Teknologi (ISTN),

Jakarta, Indonézia. Maibé, iha universidade foun ne’e mós nia la konsegue konklui nia kursu tanba nia fó prioridade liu ba atividade luta nian.

Virgílio Lamukan, hanesan mós La Sama no kuadru médiu no superiór RENETIL barak, konsistente duni ho lema RENETIL nian, “Antes Sem Titulo, do que sem Patria”. Sira hetan duni Pátria Timor-Leste, ho independénsia no liberdade nu’udar títulu ida aas liu ba sira.

Nu’udar parte husi atividade funu nian ne´ebé Virgílio Lamukan hala´o iha Jakarta maka hari’i no hametin kontatu ho ativista pro-demokrasia Indonézia no grupu solidariedade Indonézia sira ba luta povu maubere nian.

Iha ne’e mak nia halo kontatu no servisu hamutuk ho organizasaun no movimentu sira hanesan PIJAR, SPRIM, SMID, PRD FORTILOS no LSM sira hanesan ELSAM no SOLIDAMOR atu garante katak apoiu ne´ebé organizasaun no movimentu sira ne’e fo ba Povu Maubere nia luta ne’e lao tuir duni nesisidade no estratejia luta nian.

Relasaun ne´ebé Virgilio Lamukan ho ninia kompañeiru sira hametin ho movimentu no organizasaun solidariedade Indonázia nian ikus mai iha importánsia estratéjiku ida, wainhira RENETIL halao estratejia “Indonéziação do Conflito de Timor-Leste” estratejia ida-ne’ebé buka hasae Povu Indonézia nia kuñesimentu kona-ba invasaun no okupasaun militár Indonézia iha Timor-Leste no nia konsekuénsia ba Povu Indonéziu rasik no povu Timor-leste.

Aleinde nia partisipasaun iha atividade funu nian iha Indonéziu, Virgilio Lamukan mós ativu iha prosesu Internacionalização do Conflito de Timor-Leste, hodi partisipa iha eventu internasional lobuk ida. Iha 1997, Virgílio Lamukan reprezenta RENETIL iha Konferénsia XIII International Union of Socialist Youth (IUSY) iha Lilihammer, Norwegia.

Iha 1998, Virgílio Lamukan partisipa iha Konferénsia Internasionál iha Universidade Auckland, Nova Zelandia. Iha Konferénsia ne’e, Virgílio Lamukan partisipa nu´udar aprezentadór mensajem líder CNRM, Kay Rala Xanana Gusmão nian.

Iha 1999, hamutuk ho kuadru RENETIL seluk Ana Paula Fonseca, reprezenta RENETIL iha Konferénsia Asian Students’ Association (ASA) iha Thailandia.

Ho ninia kontatu ho ativista pro demokrasia Indonéziu, Virgilio Lamukan deskobre poténsia boot ida husi midia nu’udar meiu atu espresa hanoin, transmite informasaun no hala’o konsiensializasaun públiku.

Iha 1997, hafoin partisipa nu’udar partisipante estraordináriu iha formasaun jornalístika ne’ebé Institutu Studi Arus Informasi (ISAI) halo iha Wisma Tempo Sirnagalih, Virgílio Lamukan nia fuan hahú monu ba mundu jornalismu.

Virgílio Lamukan hahú konsiente katak komunikasaun sosial (imprensa) mak fatór xave ba kualker luta polítika ne´ebé implika konfrontasaun hanoin.

Ikus mai, aleinde servisu hamutuk ho movimentu klandestinu pro-demokrasia nian iha grupu Blok M nu’udar jornalista ne´ebé responsável ba rúbrika MATEBEAN ba ajénsia Si@R News.

Grupu Blok M ne’e ne´ebé lideradu husi Xefe-Redasaun revista semanál Indonézia ne´ebé koñesidu tebes, Majalah Tempo, Goenawan Mohammad, Toriq Hadad, eis-prizioneiru polítiku Soejono Tedjabayu no jornalista-ativista Indonézia seluk tan.

Ho esperiénsia jornalístiku ne’e, no ho hanoin atu amplifika prosesu Indonéziação do Conflito de Timor-Leste, Virgílio Lamukan hamutuk ho nia kompatriota estudante timor-oan lubun deside harii publikasaun semanál Talitakum iha lian Indonéziu nu’udar kanál informativu polítika rezisténsia nian.

Harii iha 1998, Talitakum sai kanál informasaun krítiku no analítiku tebes ba públiku Indonézia, liu-liu informasaun kona-ba ezisténsia no rezisténsia luta Povu Maubere nian.

Iha 1999, durante kampaña ba Konsulta Popular ka Referendum, Virgílio Lamukan sai nu´udar Xefe Redasaun ba tabloid Vox Populi. Tabloid Vox Populi ne’e Departamentu Informasaun CPCC, ne´ebé lidera husi Fernando de Araújo Lasama, maka hari’i nu’udar plataforma ba CNRT hodi halo kampaña sosializasaun ba referendu.

Hosi ninia perkursu iha luta ba ukun-rasik-an, iha movimentu rua maka rai hela impresaun boot iha Virgilio Lamukan nia personalidade, moris, hanoin no postura polítika.

Hahú kedas husi adolesente ho FRETILIN, no nu´udar joven no adultu iha RENETIL. Ba Virgílio Lamukan, FRETILIN kuda iha ninia neon konsiénsia polítika ba ukun-rasik-an.

Katak husi FRETILIN mak nia iha mehi, imajinasaun no iha inspirasaun polítika ba ukun-rasik-an. RENETIL mak Virgílio Lamukan nia eskola polítika. RENETIL mak forsa (menempa) nia maturidade polítika nasionalista no patriótika.

Iha sorumutu ho nia kompatriota sira iha RENETIL, husi sidade ba sidade iha Indonézia no husi rejiaun oi-oin Timor-Leste nian, Virgílio Lamukan hahú halo ‘discernimento’ ba konseitu polítiku ‘Unidade Nasional’ ne´ebé FRETILIN hanorin liu-husi nia Manual Polítika iha 1974-75 ka liu-husi dadolin ‘Kdadalak Suli-Mutu Fila We Inan’.

Konseitu ne´ebé iha tinan 1980 nia klaran sai fitun orientadór polítika luta ba ukun-rasik-an iha Conselho Nacional da Resistência Maubere (CNRM) nia mahon.

Hafoin tinan 20 Timor-Leste hetan nia ukun-rasik-an, Virgílio Lamukan, haree injustisa, diskriminasaun no violasaun ba direitu umanu barak mós sei mósu iha ukun-rasik-an nia laran.

Nia haree povu ki’ik barak sei moris susar, moris iha mukit nia laran. Nia preokupa tebes ho hahalok balun ne´ebé sei halo sosiedade Timor-Leste sai fragmentadu liutan, dezigualdade sosial sai boot liu tan, no grupu balun iha sosiedade nia laran sai marjinalizadu liutan.

Wainhira povu barak maka sei moris iha kiak no mukit nia laran, ema balun ne´ebé bolu ba an kombatente no veteranu, halo ezijénsia oioin ba Estadu Timor-Leste atu tau matan ba sira.

Wainhira parte balun iha sosiedade sei la hetan atendimentu husi estadu, polítiku no birokrata sira ulun moras deit lei no polítika sira ne´ebé sei fó benefisiu boot liu ba sira-nia aan.

Ba interesse grupu nian, polítiku sira uza diversidade kulturál, rasiál, étniku, relijiaun no polítiku, ne´ebé loloos tenke haburas nu´udar riku-soin sosiedade ninian, hodi hafahe timor-oan, hanesan uluk kolonialista sira halo.

Ba Virgilio Lamukan, situasaun ida-ne’e inaseitavel no muda, tanba kontra objektivu estadu nian atu hari’i sosiedade ida solidaria no fraterna iha Timor-Leste, hanesan Konstituisaun hakarak.

Virgilio Lamukan foti pozisaun ida firme la simu hahalok sira-ne’e, ne´ebé nia konsidera hanesan moras sosial. Iha Kongresu da-ne’en RENETIL ne´ebé hala’o iha eis-edifisiu CNRT, iha Matadoro, nia dehan “ita la’os tentara bayaran (mersenariu), ne’eduni ezije  ba Estadu atu selu ita-nia kolen, maibé ita nu´udar kombatente ne´ebé luta ba ukun-rasik-an ho ita nia konxiensia tomak.

Estadu tenke tau matan uluk ba povu ida-ne´ebé uluk sai alvu libertasaun nian ne´ebé ohin loron sei moris iha ki’ak no mukit nia laran. Ba Vírgilio Lamukan, nu´udar ema kombatente ida, partisipasaun iha luta ba libertasaun povu hanesan responsabilidade ida,hanesan dever ida.

Virgilio Lamukan rekunese katak impaktu husi funu ne’e la hanesan ba ema hotu-hotu; ema balun sofre mak’as liu kompara ho sira seluk.

Konsekuentemente, ema balun presiza liu atensaun no apoiu husi estadu atu bele aproveita didiak liberdade ne´ebé ita hetan husi independensian ne’e. Maibé tendensia komodifikasaun partisipasaun no sofrimentu iha funu iha sosiedade Timor-Leste agora ne’e sei halai ba polarizasaun, fragmentasaun no marjinalizasaun, no sei halo kroat liutan dezigualdade sosial iha ita-nia rai. Tamba ne’e, ohin nia kandidata-an ba Prezidente Repúblika, halo buat ruma hodi muda situasaun ida-ne’e.

Nia hakarak dudu politika sira-ne´ebé sei halo Timor ne´ebé sai fraternu liu, katak hakarak garante sosiedade Timorense ida harmonioza liu, iha ne´ebé iha respeitu mútua entre sidadaun sira ho neon livre no laran-luak ba malu.

Virgílio Lamukan fiar katak solidariedade, apoiu mútua no kooperasaun hanesan dalan di’akliu atu hetan progressu iha Timor-Leste. Fiar ida-ne’e Virgilio Lamukan kaer metin iha ninia involvimentu iha area oioin, hanesan protesaun no prezervasaun meiu ambiente, promósaun ba liberdade imprensa no dezenvolvimentu kapasidade iha jornalismu, organizasaun no mobilizasaun apoiu umanitariu no selu-seluk tan.

Iha tinan 1998, Virgilio Lamukan sai ko-fundador ONG nasional meiu-ambiente Fundasaun Haburas, hamutuk ho ninia kompanheiru sira iha RENETIL. Ikus mai, iha tinan 2013 nia sai Diretor Exekutivu durante tinan tolu.

Virgílio Lamukan preokupa ho meio-ambiente ne´ebé hetan destruisaun makas husi militar Indonézia sira. Nia hamutuk ho ninia kompanheiru sira iha RENETIL, haree katak tenki salva lais meio ambiente iha Timor hodi la lori de’it dezastre ba Timor maibé ba mundu tomak.

Virgílio Lamukan mós Ko-fundador ba Asosiasaun Jornalista Timor-Lorosa’e (AJTL) iha 1999, to’o ohin loron Virgílio Lamukan sai figura importante ida iha dezenvolvimentu imprensa no luta ba liberdade imprensa iha Timor-Leste.

Ba Virgilio Lamukan, esforsu atu garante liberdade imprensa ohin loron ne’e bele sai todan liutan tanba tenke buka halo lakon ka mitiga efeitu negativu husi hegemonia durante tempu okupasaun, iha tempu hanesan buka hametin fundamentu ba liberdade imprensa. Fobia no supressaun ba kritika no tendensia atu ignora ka okulta faktu sai ona sinonimu ho poder.

Situasaun ida-ne’e tenke muda, atu sosiedade Timorense bele sent3 duni katak iha Timor-Leste ida independente ne’e sira bele espresa sira-nia hanoin ho livre, no la tauk atu hetan persegisaun tanba ninia hanoin ka opiniaun.

Ba Virgilio Lamukan liberdade ekspresaun no imprensa ne’e la’os asuntu ida atu ko’alia de’it durante eleisaun prezidensial. Hafoin ukun aan, hamutuk ho jornalista selu-seluk, sira halo ona kampana no advokasia atu hari’i kuadru konstitusional, juridiku no politiku, ba sidadaun sira atu goza sira nia direitu ba liberdade ekspresaun no ba liberdade imprensa.

Husi sira-nia kampane no advokasia, hamutuk ho esforsu husi grupu selu-seluk, Timor-Leste ohin bele hare’e kuadru juridiku ne’ebé favoravel ba liberdade ekspresaun noliberdade imprensa, hanesan iha Artigu 40 no Artigu 41 Konstituisaun RDTL, no klasifikasaun difamasaun hanesan kazu sivil no la’os krime.

Ninia dedikasaun no kompromisu mak halo Primeiru Ministru husi I Governu Konstitusional, Dr. Marí Alkatiri, nomeia nia sai membru no prezidente Conselho Administração Serviço Público Radio-Televisão de Timor-Leste (RTTL). Kargu ne´ebé nia assume hahú husi 2003 to’o 2006.

Tanba nia konesimentu iha área komunikasaun sosial ne’ebé luan no nia integridade pesoal, Partidu Conselho Nacional da Reconstrução Timorense (CNRT) propoin nia ba Parlamento Nasional atu sai nu´udar membru Conselho de Imprensa, entidade administrativa independente ne´ebé hari bazeia ba Lei Comunicação Social No. 5/2014. Knaar ne´ebé Virgílio Lamukan lori to’o ohin loron hafoin hetan nomeasaun husi jornalista sira ba mandatu daruak nian husi 2021-2025.

Iha 2020, Virgílio Lamukan hetan Prémiu Direitus Humanus Sergio Vieira de Melo ne´ebé atribui husi Prezidente Repúblika. Premiu ne´ebé nia hetan tanba nia empenhamentu iha luta ba defeza direitus humanus, liu-liu direitu sivil no polítika.

Virgílio Lamukan mós deklara aan nu´udar feminista–hakarak luta ba sosiedade Timores nia igualidade jéneru iha aspeitu personal, sosio-kultural, ekonomia no politíka. Aleinde komprometidu iha ativismu polítiku no média, Virgílio Lamukan kompromete-an mós iha aksaun humanitária nian.

Husi 2019 to’o ohin loron, Virgílio Lamukan mós simu knaar nu’udar Presidente Board Asosiasaun Maluk Timor, ONG nasional ida-ne´ebé nia atividade foka ba servisu saúde nian.

Iha 2018-2019, hamutuk ho intelektual/profissional timoroan lubuk ida, harii ONG Kdadalak Institute for Public Policy (KDA’I), nu´udar insituisaun ne´ebé foka ba peskiza akademika hodi  produz polítika publika bazeia ba evidensia. Iha KDA’I, Virgílio Lamukan assume knaar nu’udar Prezidente Konsellu Diretivu.

Husi 2012 to’o 2018, Virgílio Lamukan haknaar mós nu’udar Sekretáriu Conselho Diretivo Nacional (CDN) Cruz Vermelha de Timor-Leste (CVTL).

Jornalista : Zezito Silva

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here