Kandidata Prezidente Republika ba périodu 2022-2027 ho númeru sorteiu, Milena Pires. Imajen/Felicidade Ximenes.

DILI, 15 marsu 2022 (TATOLI)—Iha debate públiku entre kandidatu Prezidente Repúblika (PR) ne’ebé Komisaun Nasaionál Eleisaun (CNE, sgla portugés) realiza iha tersa (15/05) kalan ne’e, kandidatu Prezidente Repúblika sira fó sira-nia hanoin importante katak Timor-Leste presiza ratifika konvensaun internasionál kona-ba direitu ema ho defisiénsia (EhD).

Kandidata PR ho númeru sorteiu hitu (7), Maria Elena Lopes de Jesus Pires “Milena Pires”, hateten importante Timor-Leste ratifika konvensaun internasionál direitu ema ho defisiénsia hodi bele kompleta orden jurídiku nasionál.

“Konkorda ratifika konvensaun ne’e no sai Prezidente Repúblikau sei luta hasoru portadór ema ho defisiénsia nia preokupasaun, hanesan nia direitu edukasaun seidauk iha ne’ebé ajuda defisiénsia matan no tilun atu bele integra didi’ak iha ensinu aprendizajen normal. Ba transporte públiku iha desavantajen boot ho mekanizmu asesu seidauk ho seguru, fasilidade iha fatin ka  edifísiu públiku laiha fasilidade,” Milena Pires hateten hodi responde pergunta hosi panelista sira iha debate públiku, iha Novo Turizmu, tersa kalan.

Tanba ne’e, bainhira nia eleita sai Xefe Estadu, nia parte sei ko’alia ho ezekutivu hodi dezenvolve polítiku integradu hodi proteje direitu báziku.

“Prezidente Repúblika iha obrigasaun tomak atu hamutuk ho Governu proteje direitu hirak ne’e naturalmente hanesan direitu votu, hodi fasilita sira presiza buletin votu uza letra braile no kria kondisaun livre hodi vota lahó influensia hosi ema sé de’it,” nia dehan.

Kandidatu ho númeru sorteiu haat (4), Rogeiro Tiago Lobato, konsidera merese duni hetan atensaun hosi Estadu tanba ema ho defisiénsia presiza iha dignidade umana, nune’e Estadu tenke investe makaas iha parte saúde.

Tanba, nia dehan, ema ho defisiénsia la’ós labele halo servisu seluk maibé bele halo ida-ne’ebé bele hanesan ema seluk haree iha rai seluk maske ema ne’e ho kondisaun la’o ladi’ak maibé hetan servisu ida kmaan.

“Karik ha’u hetan fiar hosi povu hili hanesan Prezidente mak sei fó atensaun boot, Estadu presiza investe iha saúde hodi hadi’a ema ho defisiénsia nia moris hodi hasae kapasidade bele kontribui ba dezenvolvimentu nasaun nian iha ekonomia tuir sira-nia kapasidade,” nia dehan.

Kandidatu ho númeru sorteiu 12, Virgilío da Silva Guterres, hateten iha konstituisaun loke tiha ona dalan atu Governu tau atensaun ba joven no ema ho defisiénsia liuhosi programa polítika, tanba ne’e joven tenke iha lian iha Governu.

Bainhira hetan fiar eleitu sai PR mak sei hatoo ba Governu sé de’it mak kaer ukun hasa’e Sekretária Estadu Juventude no Desportu (SEJD) sai ministéiru atu nune’e juventude iha lian iha Konsellu Ministru tanba populasaun Timor-Leste maiória joven, tan ne’e fó Estadu nia dezenvolvimentu ba joven no konseitu inkluzivu portadór defisiénsia.

PR sei sai tilun no Estadu tenke iha dever obrigasaun polítiku hodi proteje ema ho defisiénsia sai mós sujeitu iha dezenvolvimentu nasionál.

Kandidatu ho númeru sorteiu 15, Felisberto Araújo Duarte, kompara ho nasaun seluk katak Timor-Leste presiza hadi’a polítika públika atu trasa programa ka lei ruma dahuluk sujeitu ba estudu kustu benefísu ne’ebé trasa maiória benefísia duni povu ka lae, hafoin rona no aprezenta  ba Konsellu Ministru diskute maibé durante ne’e la halo.

Ho ida ne’e atu hetan alternativa polítika públika di’ak mak tuir esperiénsia nasaun seluk hanesan hodi responde kestaun juventude no defisiénsia.

Kandidata PR ho númeru sorteiu sia (9), Armanda Berta dos Santos, dehan MSSI tau matan hela ba asuntu defisiénsia no trasa ona polítika hein de’it ratifika konvensaun ema ho defisiénsia no ho ida ne’e mak bainhira eleita sai PR nia sei kontinua haree no ko’alia ho Governu atu tau atensaun no labele husik ema ida iha kotuk.

Kandidatu ho númeru 16, Mariano Assanami Sabino Lopes, hateten ratifikasaun ne’e tenke halo iha Parlamentu Nasionál tan ne’e Xefe Estadu iha dever atu ko’alia ho PN ratifika ona mak instituisaun ida-idak atu responsavel implementa programa sira hodi garante protesaun direitu sidadaun liu-liu direiu ema ho defisiénsia sira iha Timor-Leste.

Maibé, kandidatu, Francisco Guterres ‘Lú Olo’, hateten orden jurídika interna prevee hela oinsá atu bele proteje defisiénsia no bainhira PN hakarak ratiria tan naturalmente konvesaun vigór iha orden jurídika rai laran hodi fó protesaun di’ak liu tan ema ho defisiénsia.

“Maibé ba ha’u orjen jurídika internál iha ona importante liu mak polítika inkluzaun sosiál atu labele halo diskriminasaun ba ema hotu ne’ebé Prezidente Repúblika sei koopera nafatin ho Governu hodi haree,” nia dehan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here