Kandidatu Prezidente Repúblika períodu 2022-2027, hosi partidu CNRT, José Ramos Horta. Imajen TATOLI/Egas Cristóvão.

DILI, 15 marsu 2022 (TATOLI)—Kandidatu Prezidente Repúblika períodu 2022-2027 ho númeru sorteiu 14, Jose Ramos Horta, hateten nia hakarak kandidata an nu’udar Prezidente Republik tanba ho hanoin ida-ne’ebé boot atu halo koeresaun ba violasaun Konstituisaun RDTL.

Notísia Relevante: Dirijente CNRT husu apoiante kandidatu PR Horta mantein dixiplina iha kampaña

“Enfrenta no dezafiu nivel nasionál entermu restaurasaun ordén konstitusionál, korresaun violasaun ne’ebé Prezidente Republika halo no korresaun ba violasaun ne’ebé akontese iha Parlamentu Nasionál, fallansu iha Tribunál Rekursu atu haree ba violasaun konstitusionál sira ne’e,” Ramos Horta hateten liuhusi entrevista ekkluzivu ba programa ‘Hili Ita-Nia Prezidente repúblika’.

Ramos Horta nu’udar kandidatu hosi Partidu CNRT ho proponente besik rihun 15 ne’e, simu konvite hosi Prezidente Partidu CNRT, Kay Rala Xanana Gusmão, hodi kontinua ninia komitmentu hodi bele hadi’a violasaun sira-ne’ebé akontese bainhira eleitu ba Prezidente Repúblika ba períodu 2022-2027.

Biografia

José Manuel Ramos Horta moris iha loron 26 Dezenbru 1949 ne’e oan-mane mane hosi inan ema Timor, Natalina Ramos Filipe Horta no aman ema Portugés, Francisco Horta. José Ramos Horta iha maun-alin hamutuk nain-11, na’in-tolu (3) husi maun alin hirak ne’e mate iha tempu okupasaun Indonézia.

Eis jornalista iha tinan 1969 iha Timor-Leste (TL) ne’e, iha Dezembru 1996 hamutuk ho Bispu Don Carlos Filipe Ximenes Belo, SDB, simu premiu Nobel da Paz nian tamba sira-nia dedikasaun luta ba direitu umanu iha Timor-Leste hodi hetan solusaun ida-ne’ebé justu no dame ba konflitu TL.

Iha tinan 2007, Ramos Horta eleitu nudar Prezidente Repúblika no hetan tomada de pose iha loron 20 maiu 2007. Eis alumni hosi eskola misaun Katóliku ne’e, nia divorsiadu no iha oan mane ida ho naran Loro Horta.

Ramos Horta nu’udar fundadór Partidu FRETILIN no bainhira TL deklara unilaterálmente nia independénsia, Ramos Horta asume kargu nudar Ministru Negósiu Estranjeiru no Informasaun.

Diplomata Timor-oan ho esperiénsia lubuk ne’e, iha tempu ne’eba FRETILIN husu nia  sai ba rai-li’ur hodi buka apoiu internasionál ba independénsia ne’ebé mak FRETILIN proklama unilateralmente iha 28 novembru 1975.

Hosi tinan 1975 to’o 1999, Ramos Horta sai Vise Permanente FRETILIN iha Nasaun Unida. Ramos Horta sai diplomata ida-ne’ebé ho idade kiik liu iha istória ONU nian.

Iha Nova Iorke, Estadu Unidu Amérika, Ramos Horta, halo nia viajen ba rai hotu hodi ko’alia ho Governu no kria liña apoiante ba kauza ne’ebé akontese ba povu maubere.

Iha tinan 1990, nia hela iha Sydney, Australia no harii programa treinamentu ba diplomásia iha Universidade New South Wales.

Bainhira TL nia Independénsia iha tinan 1999, Ramos Horta fila mai TL no ikus mai nia simu kargu nu’udar Ministru Negósiu Estranjeiru no Kooperasaun iha Governu FRETILIN nian.

Iha loron 10 fulan Jullu 2006, hafoin rezignasaun Primeiru Ministru, Mari Alkatiri, Ramos Horta simu pose nu’udar Primeiru Ministru TL nian.

Wainhira nu’dar Prezidente da Republika, Ramos Horta hetan kanek hafoin tentasaun tentasaun asasinadu iha loron 11 fevereiru 2008 ne’ebe hala’o hosi grupu eis-komandante Polísia Militár F–FDTL, Alfredo Reinado Alves.

Mestradu iha área Estudu kona-ba Pás iha Universidade Antioch, Estados-Unidus ne’e, hatene ko’alia ho di’ak lian Tetun, Portugés, Inglés no España.

Ramos Horta nu’udar mós Doutor Honoris Causa hosi Universidade do Porto, Portugal, Victory University-Australia, Gyungwoon University-Korea Sul no Doutor Honoris Causa hosi Universidade National Cambodia-Phnom Penh.

Premiu  sira-ne’ebe Ramos Horta hetan mak hanesan:

  • 2011- Order of Amilcar Cabral –First Degree- Republik of          Cavo Verde
  • 2010- Order of Jose Marti- Cuba
  • 2008-The Grand Collar of the order of Price Henry the            Navigator, Portugal
  • 2004-The Grand Cross of the Order of Rio Branco, Brazil
  • 2001-Hollywood Film Festival Humanitarian Award, L,A, US
  • 2002-Gloden Plate Award, Academy of Achievements, N,Y US
  • 2000-Gold Medal of President of Italy
  • 1999- First Hague Peace Appeal Award, Nederland
  • 1998-Gold Medal of the University Coimbra Portugal
  • 1998-The Green Cross of the Orden Freedom, Portugal
  • 1997-Medal of the University of San Francisco, CA, US
  • 1996-Nobel Peace Prize, Olso, Norway
  • 1996-Frist UNPO Freedom Prize, Nederlands
  • 1995-Internasional Peace Activist Award, Gleitman Foundation, CA, US
  • 1993- Professor Thorof Rafto Humangths Award, Germany

Notísia Relevante: Kandidatu Ramos Horta rejista ona iha Tribunál Rekursu

Jornalista : Armandina Moniz

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here